ചത്ത മാനിനെ കറിവെച്ച് കഴിച്ചു; രണ്ട് ഫോറസ്റ്റ് ഓഫിസർമാർക്ക് സസ്പെൻഷൻ

സ്വന്തം ലേഖകൻ

പാലക്കാട്: ചത്ത മാനിനെ ഭക്ഷിച്ച ഫോറസ്റ്റ് ഓഫിസർമാർക്ക് സസ്പെൻഷൻ. പാലക്കാട് പാലോട് സെക്ഷൻ ഫോറസ്റ്റ് ഓഫീസർ അരുൺ ലാൽ, ബീറ്റ് ഓഫീസർ എസ് ഷജീദ് എന്നിവരെയാണ് സസ്പെൻഡ് ചെയ്തത്. പാലോട് വനത്തിൽ ചത്ത നിലയിൽ കണ്ടെത്തിയ മാനിനെ ഇവർ കറിവെച്ച് കഴിക്കുകയായിരുന്നു. സംഭവത്തിൽ വിജിലൻസ് അന്വേഷണം അടിയന്തിരമായി പൂർത്തിയാക്കാനും നിർദ്ദേശം നൽകി.

ചുളിയാമല സെക്ഷനിൽ മെയ് 10നാണ് സംഭവം. മാനിനെ ഉദ്യോഗസ്ഥർ സെക്ഷൻ ഓഫിസിൽ എത്തിച്ച് ഇറച്ചിയാക്കിയെന്നാണു വിവരം.എന്നാൽ ചത്ത മാൻ തന്നെ ആയിരുന്നോ അതെന്ന ചോദ്യങ്ങളും ഉയരുന്നുണ്ട്. ഒരു മാസത്തിന് ശേഷമാണ് സംഭവം പുറത്തറിഞ്ഞത്.

പിന്നാലെ റേഞ്ച് ഓഫീസർ ഇവരെ സസ്‌പെൻഡ് ചെയ്യാൻ ശുപാർശ ചെയ്യുകയായിരുന്നു. സംഭവം കണ്ടെത്തുന്നതിൽ വീഴ്ച വരുത്തിയ പാലോട് റേഞ്ച് ഓഫീസർ ഉൾപ്പെടെ മെയ് 10ന് ഡ്യൂട്ടിയിലുണ്ടായിരുന്ന മുഴുവൻ ഉദ്യോഗസ്ഥരെ സ്ഥലം മാറ്റുകയും ചെയ്തു.