ഏറ്റുമാനൂർ പേരൂരിൽ പഞ്ചറായതിനെ തുടർന്ന് വീട്ടുമുറ്റത്ത് സൂക്ഷിച്ചിരുന്ന ഡ്യൂക്ക് ബൈക്ക് മോഷ്ടിച്ചു: മോഷ്ടിച്ചത് 3.75 ലക്ഷം രൂപയുടെ ബൈക്ക്: ലോക്ക് ഡൗണിലും രാത്രി മോഷണത്തിൽ നാട് ഞെട്ടി

സ്വന്തം ലേഖകൻ

ഏറ്റുമാനൂർ: പഞ്ചറായതിനെ തുടർന്ന് വീട്ടുമുറ്റത്ത് സൂക്ഷിച്ചിരുന്ന ഡ്യൂക്ക് ബൈക്ക് മോഷണം പോയി. ഏറ്റുമാനൂർ പേരൂർ പൂവത്തുംമൂട്​ അരയിരത്ത് കുഴിമറ്റത്തിൽ സിദ്ധാർഥ്​ എസ്​. നായരുടെ കെ.എൽ. 33 കെ.7327 എന്ന രജിസ്​ട്രേഷൻ നമ്പറിലുള്ള കെ.ടി.എം ഡ്യൂക്ക് മോഡൽ ബൈക്കാണ്​ വ്യാഴാഴ്​ച അർദ്ധ രാത്രി 12 മണിക്ക് ശേഷം മോഷണം പോയത്​. 3.75 ലക്ഷത്തോളം വിലയുള്ള ബൈക്കാണിത്.

സ്വകാര്യ ഫൈനാൻസ് സ്ഥാഥപനത്തിലെ ജീവനക്കാരനായ സിദ്ധാർഥ്​, വാടകയ്ക്ക് താമസിക്കുന്ന പേരൂരിലെ വീടിൻ്റെ മുറ്റത്ത്​ രണ്ട്​ ഓ​ട്ടോയും, അഞ്ച്​ ഇരുചക്രവാഹനങ്ങളും നിർത്തിയിട്ടിരുന്നു. ഇതിൽ ഡ്യൂക്ക്​ ബൈക്ക്​ മാത്രമാണ്​ മോഷ്​ടാക്കൾ കവർന്നത്​.

ബൈക്കിൻ്റ മുൻ ചക്രം പഞ്ചറായിരുന്നു. ഹാൻഡിൽ ലോക്ക്​ ചെയ്തിരുന്നതുമാണ്.
ഇതിനാൽ ലോക്ക് തകർത്ത് തള്ളി നീക്കിയോ ,അല്ലെങ്കിൽ ബൈക്ക്​ മറ്റൊരു വാഹനത്തിൽ കയറ്റി കൊണ്ടുപോയിട്ടുണ്ടാവുമെന്നാണ്​ നിഗമനം. വീട്ടുകാർ ഏറ്റുമാനൂർ പൊലീസിൽ പരാതി നൽകി.

പേരൂർ- ഏറ്റുമാനൂർ ഭാഗങ്ങളിൽ മോഷണം പതിവാകുന്നതായും നാട്ടുകാർ പരാതിപ്പെടുന്നുണ്ട്. കൊവിഡ് കാലത്ത് രാത്രിയിൽ പൊലീസിൻ്റെ വാഹന പരിശോധന ശക്തമാണ്. ഇതിനിടെയാണ് ബൈക്ക് മോഷണം നടന്നിരിക്കുന്നത്. ഇതിൽ ഇപ്പോൾ ഞെട്ടിവിറച്ചിരിക്കുകയാണ് നാട്.