കൊവിഡ് പ്രതിരോധത്തിൽ വീണ്ടും നാണംകെട്ട് കെ.സുരേന്ദ്രൻ: കേരളത്തെ പൊളിക്കാൻ കേന്ദ്രത്തിനു കത്തയച്ച സുരേന്ദ്രനു പാളി; കേരളത്തിന്റെ കൊവിഡ് പ്രതിരോധം ഏറ്റവും മികച്ചതെന്നു കേന്ദ്ര സംഘം

തേർഡ് ഐ ബ്യൂറോ

തിരുവനന്തപുരം: കൊവിഡ് പ്രതിരോധത്തിൽ കേരളത്തെക്കൊട്ടാൻ കേന്ദ്ര സംഘത്തെ വിളിച്ചു വരുത്തിയ ബി.ജെ.പി സംസ്ഥാന അദ്ധ്യക്ഷൻ കെ.സുരേന്ദ്രനു പാളി. കേരളത്തിൽ കൊവിഡ് പടരുന്നെന്നും, കേന്ദ്ര സംഘത്തെ അയച്ച് സ്ഥിതി ഗതി നിയന്ത്രിക്കണെന്നും ആവശ്യപ്പെട്ടാണ് കെ.സുരേന്ദ്രൻ കത്തയച്ചത്. കെ.സുരേന്ദ്രന്റെ കത്ത് കിട്ടി കേരളത്തിൽ എത്തിയ കേന്ദ്ര സംഘം സുരേന്ദ്രൻ പറഞ്ഞതൊന്നുമല്ല കണ്ടത്.

കേരളത്തിന്റെ കൊവിഡ് പ്രതിരോധം മികച്ചതെന്ന് കേന്ദ്ര സർക്കാർ സംഘം ഇപ്പോൾ വ്യക്തമാക്കിയതോടെയാണ് ബി.ജെ.പി സംസ്ഥാന പ്രസിഡന്റിന്റെ വാദം പൊളിഞ്ഞത്. കൊവിഡിന്റെ വർദ്ധന തടയാൻ കഴിഞ്ഞത് കേരളത്തിന്റെ വിജയമാണ്. രോഗപ്രതിരോധത്തിൽ മികച്ച പ്രവർത്തനങ്ങളാണ് കേരളം നടത്തുന്നത്. സംസ്ഥാന ആരോഗ്യമന്ത്രി കെകെ ശൈലജ ടീച്ചറുമായി നടത്തിയ ചർച്ചയ്ക്ക് ശേഷമാണ് കേന്ദ്ര സംഘം ഈ നിഗമനത്തിലെത്തിയത്.

സംസ്ഥാനത്തിന്റെ പ്രതിരോധപ്രവർത്തനങ്ങൾ ഫീൽഡ് തലത്തിലും ഔദ്യോഗിക തലത്തിലും സംഘം വിലയിരുത്തിയിരുന്നു. ഇതനുസരിച്ചുള്ള റിപ്പോർട്ട് സർക്കാരിന് നൽകുമെന്നും കേന്ദ്രസംഘം അറിയിച്ചു.

കേരളം കൊവിഡ് രോഗത്തിനെതിരെ തുടക്കം മുതൽ പുലർത്തിവന്ന ജാഗ്രതയെയും സന്തുഷ്ടി പ്രകടിപ്പിച്ചിട്ടുണ്ടെന്ന് ആരോഗ്യമന്ത്രി വ്യക്തമാക്കി. ടെസ്റ്റ്, വാക്‌സിനേഷൻ അടക്കമുള്ള കാര്യങ്ങളിൽ നല്ല ചർച്ചയാണ് നടന്നതെന്നും ആരോഗ്യ മന്ത്രി കെകെ ശൈലജ പറഞ്ഞു. അവരുടെ നിർദേശങ്ങൾ അവർ തയ്യാറാക്കി തരാമെന്ന് പറഞ്ഞിട്ടുണ്ട്. കേന്ദ്രസംഘത്തിന്റെ നിർദേശങ്ങൾ നടപ്പിലാക്കുന്നതാണ്. പക്ഷിപ്പനിയിലും കൊവിഡിലും കേരളം എടുത്ത മുൻകൈയ്യും അവർ സൂചിപ്പിക്കുകയുണ്ടായി. മന്ത്രി അറിയിച്ചു.

ബിജെപി സംസ്ഥാന അദ്ധ്യക്ഷൻ കെ.സുരേന്ദ്രന്റെ അഭ്യർത്ഥന പ്രകാരം ഏഴാം തീയതിയാണ് കേന്ദ്രസംഘം സംസ്ഥാനത്തെത്തിയത്.

കേരളത്തിലേക്ക് പ്രത്യേക മെഡിക്കൽ സംഘത്തെ അയക്കണമെന്ന് കെ. സുരേന്ദ്രൻ പ്രധാനമന്ത്രിക്ക് അയച്ച കത്തിലൂടെ ആവശ്യപ്പെട്ടിരുന്നു. മിനിസ്ട്രി ഓഫ് ഫുഡ് പ്രോസസിംഗ് ഇൻഡസ്ട്രീസ് ജോയിന്റ് സെക്രട്ടറിയും കൊവിഡ്-19 നോഡൽ ഓഫീസറുമായ മിൻഹാജ് അലാം, നാഷണൽ സെൻട്രൽ ഫോർ ഡിസീസ് കൺട്രോൾ ഡയറക്ടർ ഡോ എസ്.കെ സിംഗ് എന്നിവരാണ് കേന്ദ്ര സംഘത്തിൽ ഉൾപ്പെട്ടിട്ടുള്ളത്.