67-ാം മത് സംസ്ഥാന സ്കൂള്‍ കായിക മേളയില്‍ ഇനി കളരിപ്പയറ്റ്, ഫെൻസിങ്, യോഗ എന്നീ ഇനങ്ങളും; ഉത്തരവിറക്കി സര്‍ക്കാര്‍

തിരുവനന്തപുരം: സംസ്ഥാന സ്കൂള്‍ കായികമേളയിലെ മത്സര ഇനങ്ങളില്‍ കളരിപ്പയറ്റ്, ഫെൻസിങ്, യോഗ എന്നിവും ഉള്‍പ്പെടുത്തി ഉത്തരവിറക്കി സർക്കാർ.

അണ്ടർ 17,19 (ബോയ്സ്, ഗേള്‍സ്) വിഭാഗങ്ങളായാണ് കളരിപ്പയറ്റ് നടത്തുക. ഫെൻസിങും യോഗയും അണ്ടർ 14,17 (ബോയ്സ്, ഗേള്‍സ്) വിഭാഗങ്ങളിലായും നടത്തും. പൊതുവിദ്യാഭ്യാസ ഡയറക്ടറുടെ ശുപാർശയെ അടിസ്ഥാനമാക്കിയാണ് സർക്കാർ ഉത്തരവ് പുറപ്പെടുവിച്ചത്.

അതേസമയം, ഒളിമ്ബിക്സ് മാതൃകയില്‍ നടത്തുന്ന 67-ാം മത് സംസ്ഥാന സ്കൂള്‍ കായികമേള ഒക്ടോബർ 21 വൈകിട്ട് നാലിന് തിരുവനന്തപുരത്ത് മുഖ്യമന്ത്രി പിണറായി വിജയൻ ഉദ്ഘാടനം ചെയ്യും.

മൊത്തം 12 സ്റ്റേഡിയങ്ങളിലായി മത്സരങ്ങൾ നടക്കും. കായിക മേളയുടെ ബ്രാൻഡ് അംബാസഡറായി രാജ്യാന്തര ക്രിക്കറ്റ് താരം സഞ്ജു സാംസണെയും ഗുഡ്വില്‍ അംബസഡറായി നടി കീർത്തി സുരേഷിനെയും പ്രഖ്യാപിച്ചിരുന്നു.