ഡൽഹിയിൽ കുട്ടികളുടെ ആശുപത്രിയിൽ വൻ തീപിടിത്തം; 6 നവജാത ശിശുക്കൾ വെന്തു മരിച്ചു ; ആറ് കുഞ്ഞുങ്ങൾക്ക് പൊള്ളലേറ്റു ; ഒരു കുട്ടിയുടെ നില ​ഗുരുതരം

സ്വന്തം ലേഖകൻ

ന്യൂഡൽഹി: വിവേക് വിഹാറിലെ ന്യൂബോൺ ബേബി കെയർ ആശുപത്രിയിലുണ്ടായ വൻ തീപിടിത്തത്തിൽ ആറ് നവജാത ശിശുക്കൾ വെന്തു മരിച്ചു. ആറ് കുഞ്ഞുങ്ങൾക്ക് പൊള്ളലേറ്റു. ഇതിൽ ഒരു കുട്ടിയുടെ നില ​ഗുരുതരമാണ്. 12 കുഞ്ഞുങ്ങളെ രക്ഷപ്പെടുത്തി.

ഇന്നലെ രാത്രിയാണ് തീപിടിത്തമുണ്ടായത്. തീ പൂർണമായും നിയന്ത്രണ വിധേയമായതാണ് റിപ്പോർട്ടുകൾ. 12 അ​ഗ്നിശമന സേനാ യൂണിറ്റുകൾ എത്തിയാണ് തീ നിയന്ത്രിച്ചത്.

തീപിടിത്തത്തിന്റെ കാരണം സംബന്ധിച്ചു വ്യക്തത വന്നിട്ടില്ല. തീപടർന്നതിനു പിന്നാലെ തന്നെ കുട്ടികളെ മാറ്റിയിരുന്നു. പുക ശ്വസിച്ചതും കുട്ടികളുടെ മരണത്തിനിടയാക്കിയതായി പ്രാഥമിക വിലയിരുത്തലുണ്ട്.