തിരുവനന്തപുരം: സംസ്ഥാനത്ത് അമീബിക്ക് മസ്തിഷ്ക ജ്വരം തടയാന് കർമ്മ പദ്ധതിയുമായി സർക്കാർ.
ജല സ്രോതസുകള് വൃത്തിയായി സൂക്ഷിക്കണമെന്ന് ആരോഗ്യ വകുപ്പ് മന്ത്രി വീണാ ജോര്ജ്. മുഖ്യമന്ത്രിയുടെ നേതൃത്വത്തില് ചേര്ന്ന യോഗത്തിലെ നിര്ദേശാനുസരണമാണ് തീരുമാനം.
തദ്ദേശ സ്വയംഭരണ സ്ഥാപനങ്ങള്, ഹരിതകേരളം മിഷന്, ജലവിഭവ വകുപ്പ് എന്നിവയുടെ നേതൃത്വത്തില് നടക്കുന്ന ജനകീയ ക്യാമ്പയിനില് എല്ലാ ആരോഗ്യ പ്രവര്ത്തകരും സ്ഥാപനങ്ങളും പങ്കെടുക്കേണ്ടതാണ്.
ആഗസ്റ്റ് 30, 31 (ശനി, ഞായര്) ദിവസങ്ങളില് സംസ്ഥാനത്തെ മുഴുവന് വീടുകളിലേയും സ്ഥാപനങ്ങളിലേയും കിണറുകള് ക്ലോറിനേറ്റ് ചെയ്യുകയും ജലസംഭരണ ടാങ്കുകള് തേച്ച് കഴുകി വൃത്തിയാക്കുകയും ചെയ്യണം.
Whatsapp Group 1 | Whatsapp Group 2 |Telegram Group
വീടുകള്, ആശുപത്രികള്, വിദ്യാഭ്യാസ സ്ഥാപനങ്ങള്, ഹോസ്റ്റലുകള്, ഫ്ളാറ്റുകള് തുടങ്ങി എല്ലായിടത്തേയും ജലസംഭരണ ടാങ്കുകള് വൃത്തിയാക്കണം.മന്ത്രി വീണാ ജോര്ജിന്റെ നേതൃത്വത്തില് ആരോഗ്യ വകുപ്പിന്റെ ഉന്നതതല യോഗം ചേര്ന്ന് നിലവിലെ സ്ഥതി വിലയിരുത്തി.
ഈ വര്ഷം 41 അമീബിക്ക് മസ്തിഷ്ക ജ്വരം കേസുകളാണ് റിപ്പോര്ട്ട് ചെയ്തത്. നിലവില് 18 ആക്ടീവ് കേസുകളാണുള്ളത്. തിരുവനന്തപുരം, കൊല്ലം, കോഴിക്കോട്, വയനാട്, മലപ്പുറം ജില്ലകളിലാണ് കേസുകള് റിപ്പോര്ട്ട് ചെയ്തിട്ടുള്ളത്.
ചികിത്സയ്ക്കാവശ്യമായ മരുന്നുകള് ഉറപ്പാക്കാനും മന്ത്രി നിര്ദേശം നല്കി. റിസോര്ട്ടുകള്, ഹോട്ടലുകള്, വാട്ടര് തീം പാര്ക്കുകള്, നീന്തല് പരിശീലന കേന്ദ്രങ്ങള് എന്നിവിടങ്ങളിലെ ജലം ക്ലോറിനേറ്റ് ചെയ്യുകയും ക്ലോറിന് അളവുകള് പരിശോധിച്ച് ഉറപ്പ് വരുത്തേണ്ടതുമാണ്.
ഇത് പാലിക്കാത്തവര്ക്കെതിരെ പൊതുജനാരോഗ്യ നിയമ പ്രകാരം നടപടി സ്വീകരിക്കുന്നതാണ്. കുടിവെള്ള സ്രോതസുകള് ആരോഗ്യ പ്രവര്ത്തകര് പരിശോധിച്ച് ഉറപ്പ് വരുത്താന് മന്ത്രി നിര്ദേശം നല്കി.
