പാറമടയ്ക്ക് വേണ്ടി രാഷ്ട്രീയം മറന്ന് സി.പി.എമ്മും കോണ്‍ഗ്രസും; വിയോജനക്കുറുപ്പുമായി സി.പി.ഐയും കേരള കോണ്‍ഗ്രസ് എമ്മും; പ്രതിഷേധവുമായി മണിമല നിവാസികൾ….!
സ്വന്തം ലേഖിക
മണിമല: നാട്ടുകാരുടെ പരാതി അവഗണിച്ച്‌ പാറമടയ്ക്ക് അനുവാദം നല്‍കാന്‍ മുഖ്യഭരണകക്ഷിയായ സി.പി.എമ്മും പ്രതിപക്ഷമായ കോണ്‍ഗ്രസും രാഷ്ട്രീയം മറന്ന് ഒന്നിച്ചപ്പോള്‍ വിയോജനക്കുറുപ്പുമായി സി.പി.ഐയും കേരള കോണ്‍ഗ്രസ് എമ്മും.
മണിമല പഞ്ചായത്തിലാണ് ഭരണ-പ്രതിപക്ഷ നിരയിലെ മുഖ്യകക്ഷികള്‍ പാറമടയ്ക്കായി ഒന്നിച്ചത്. രണ്ടാം വാര്‍ഡില്‍ പൂവത്തോലി ഭാഗത്തുള്ള പാറമടയ്ക്കെതിരെയാണ് നാട്ടുകാര്‍ പരാതി നല്‍കിയത്. തുടര്‍ന്ന് അന്വേഷണം നടത്തിയെങ്കിലും റിപ്പോര്‍ട്ട് കമ്മിറ്റിയില്‍ വയ്ക്കാതെ ലൈസന്‍സ് പുതുക്കി നല്‍കാന്‍ തീരുമാനിക്കുകയായിരുന്നു.
Whatsapp Group 1 | Whatsapp Group 2 |Telegram Group
പഞ്ചായത്ത് ഭരിക്കുന്ന ഇടതു മുന്നണിയില്‍ സി.പി.എം അംഗങ്ങളുടെ തീരുമാനത്തിന് സി.പി.ഐയും കേരളാകോണ്‍ഗ്രസും വിയോജിപ്പ് രേഖപ്പെടുത്തിയപ്പോള്‍ പ്രതിപക്ഷമായ കോണ്‍ഗ്രസിന്റെ പിന്തുണയിലാണ് ഭൂരിപക്ഷം നേടിയത്. സി.പി.ഐ, കേരളാ കോണ്‍ഗ്രസ് അംഗങ്ങള്‍ തീരുമാനത്തിന് രേഖാമൂലമുള്ള വിയോജനക്കുറുപ്പും രേഖപ്പെടുത്തിയിട്ടുണ്ട്.
പൂവത്തോലിയിലെ പാറമടക്കെതിരെ തദ്ദേശവാസികളുടെ പരാതി നിലനില്‍ക്കുന്നുണ്ട്. പാറമടയ്ക്ക് മുകള്‍ ഭാഗത്താണ് മണിമല കുടിവെള്ളപദ്ധതിയുടെ ടാങ്ക് സ്ഥിതി ചെയ്യുന്നത്. പാറമടയിലേക്ക് വലിയ വാഹനങ്ങള്‍ വരുന്നത് മൂലം പാറമടയ്ക്ക് സമീപത്തു കൂടി പോകുന്ന പഞ്ചായത്ത് റോഡും തകര്‍ന്ന നിലയിലാണ്.
കഴിഞ്ഞമാസം ടാറിംഗ് പൂര്‍ത്തിയാക്കിയ മണിമല പഴയിടം തീരദേശറോഡിന്റെ പലഭാഗങ്ങളും പൊളിയുകയും റോഡിന്റെ വശങ്ങള്‍ താഴ്ന്നു പോകുകയും ചെയ്യുന്നുണ്ട്. ജനങ്ങളുടെ ജീവനും സ്വത്തിനും സംരക്ഷണം നല്കണമെന്ന ഉത്തരവാദിത്വം മാനിക്കാതെ പാറമടക്ക് ലൈസന്‍സ് നല്‍കിയതിനെതിരെ പ്രക്ഷോഭത്തിനുള്ള തയ്യാറെടുപ്പിലാണ് പ്രദേശവാസികള്‍.
