ഗുഡല്ലൂർ: സൗജന്യ ബസ് യാത്രയും മിനി ബസ് സർവീസും ഓട്ടോ, ജീപ്പ് ഡ്രൈവർമാരുടെ ഉപജീവനത്തെ പ്രതികൂലമായി ബാധിച്ചു.
ടാക്സി വാഹനങ്ങള്‍ സർവീസ് നിർത്തിവച്ച്‌ മറ്റ് ജോലികളിലേക്ക് ഡ്രൈവർമാർ നീങ്ങുകയാണ്. ഇതുസംബന്ധിച്ച്‌ മുഖ്യമന്ത്രിക്ക് പിഎംകെ ജില്ലാ പ്രസിഡന്റ് എ. ഹംസ നിവേദനം നല്‍കി.
നീലഗിരി ജില്ലയിലെ ഗൂഡല്ലൂർ, പന്തല്ലൂർ താലൂക്കുകളിലെ ഓട്ടോ, ജീപ്പ് ഡ്രൈവർമാർ കടുത്ത സാമ്പത്തിക പ്രതിസന്ധി നേരിടുകയാണെന്നും അവരുടെ ഉപജീവനം സംരക്ഷിക്കാൻ തമിഴ്നാട് സർക്കാർ അടിയന്തര നടപടി സ്വീകരിക്കണമെന്നും അദ്ദേഹം ആവശ്യപ്പെട്ടു.
ഗൂഡല്ലൂർ, പന്തല്ലൂർ ഉള്‍പ്പെടെയുള്ള കേരള അതിർത്തി പ്രദേശങ്ങളില്‍ തമിഴ്നാട്, കേരള സർക്കാർ ബസുകളില്‍ സ്ത്രീകള്‍ക്ക് സൗജന്യ യാത്ര അനുവദിച്ചിട്ടുള്ളതിനാല്‍ കൂടുതല്‍ ആളുകളും ബസ് യാത്ര തെരഞ്ഞെടുക്കുകയാണ്. ഇതോടെ ഓട്ടോ, ജീപ്പ് സർവീസുകളെ ആശ്രയിച്ചിരുന്ന യാത്രക്കാരുടെ എണ്ണം കുറഞ്ഞതായും ഡ്രൈവർമാരുടെ വരുമാനത്തെ ഇത് സാരമായി ബാധിച്ചതായും നിവേദനത്തില്‍ ചൂണ്ടിക്കാട്ടി.
ഇന്ധന വിലവർധന, വാഹനങ്ങളുടെ അറ്റകുറ്റപ്പണി, ബാങ്ക് വായ്പകളുടെ തിരിച്ചടവ്, സ്വകാര്യ ധനകാര്യ സ്ഥാപനങ്ങളില്‍ നിന്നെടുത്ത ഉയർന്ന പലിശയുള്ള വായ്പകള്‍ എന്നിവ ഡ്രൈവർമാരുടെ സാമ്പത്തികഭാരം വർധിപ്പിച്ചിട്ടുണ്ട്. വരുമാനം കുറഞ്ഞതോടെ പലർക്കും വായ്പാ തിരിച്ചടവ് നടത്താൻ കഴിയാത്ത സാഹചര്യമാണുള്ളത്.
ഉപജീവനമാർഗമായിരുന്ന വാഹനങ്ങള്‍ ഓടിക്കുന്നത് നിർത്തിവച്ച്‌ കുടുംബം പോറ്റാൻ മറ്റു പണികള്‍ തേടിപ്പോകേണ്ട അവസ്ഥയിലാണ് പലരും.
