തൃശ്ശൂർ: തിരുവനന്തപുരം കോർപറേഷൻ വാഴോട്ടുകോണം വാർഡ് ബിജെപി കൗണ്സിലർ ആർ സുഗതന്റെ സത്യപ്രതിജ്ഞയില് പ്രതികരിച്ച് മേയർ വിവി രാജേഷ്. ഹൈക്കോടതി ഉത്തരവ് കൃത്യ സമയത്ത് നടപ്പാക്കിയെന്ന് മേയർ വിവി രാജേഷ് ചൂണ്ടിക്കാട്ടി.
കൗണ്സില് യോഗത്തില് പങ്കെടുക്കുന്ന കാര്യം കോടതിയുടെ പരിഗണനയിലാണെന്നും സുഗതന്റെ അഭിഭാഷക സംഘം കാര്യങ്ങള് നോക്കുമെന്നും മേയർ പറഞ്ഞു. അതില് വരുന്ന ഉത്തരവുകള് നടപ്പിലാക്കുക എന്നതാണ് കോർപ്പറേഷന്റെ ദൗത്യം.
കൗണ്സിലറുടെ അവധി അപേക്ഷയില് നിയമോപദേശം തേടിയിട്ടുണ്ട്. കാപ്പ ആക്ട് കേരളത്തില് മാത്രമാണുളളത്. അതുകൊണ്ടാണ് ഇത്തരം സംഭവങ്ങള് കേരളത്തില് മാത്രമാകുന്നത്. രാഷ്ട്രീയ സമരങ്ങളില് പങ്കെടുത്ത കേസുകള് എല്ലാവർക്കും ഉണ്ട്. ശക്തമായ വിയോജിപ്പ് സിപിഐഎമ്മിന്റെ ഭാഗത്തുനിന്ന് ഉണ്ടാകുമെന്ന് അറിയാമെന്നും ഒരിഞ്ച് പിന്നോട്ടില്ലെന്നും വിവി രാജേഷ് വിശദമാക്കി.
കൗണ്സിലറുടെ അസാന്നിധ്യം വരുന്ന സാഹചര്യങ്ങളില് അത് മറികടക്കാനുള്ള സംവിധാനങ്ങളുണ്ട്. സുഗതന്റെ വാർഡിലെ കാര്യങ്ങള്ക്ക് മേയർ നേതൃത്വം നല്കും. വാർഡിലെ കാര്യങ്ങള്ക്ക് ഒരു തടസ്സവും ഉണ്ടാകില്ലെന്നും മേയർ ഉറപ്പുനല്കി.
