ഡൽഹി: മുഖ്യതിരഞ്ഞെടുപ്പ് കമ്മീഷ്ണർ ഗ്യാനേഷ് കുമാറിനും പ്രധാനമന്ത്രി നരേന്ദ്ര മോദിക്കുമെതിരെ ആഞ്ഞടിച്ച്‌ ലോക്സഭ പ്രതിപക്ഷ നേതാവ് രാഹുല്‍ ഗാന്ധി.
ഗ്യാനേഷ് കുമാർ ജയിലില്‍ പോകുക തന്നെ ചെയ്യുമെന്ന് രാഹുല്‍ പറഞ്ഞു. നരേന്ദ്ര മോദിക്കും അമിത് ഷായ്ക്കുമെതിരെ നടപടി ഉണ്ടാകും. രാജ്യത്ത് ജനാധിപത്യത്തെ കുഴിച്ചുമൂടാൻ അനുവദിക്കില്ലെന്നും രാംലീല മൈതാനത്ത് നടന്ന ഇന്ത്യ സഖ്യ റാലിയില്‍ സംസാരിക്കവെ രാഹുല്‍ പറഞ്ഞു.
'രാജ്യത്തെ ജനാധിപത്യ സംവിധാനങ്ങളെ ശരിയായ പാതയിലാക്കണമെങ്കില്‍ ആദ്യം ഗ്യാനേഷ് കുമാറിനെ മുഖ്യതിരഞ്ഞെടുപ്പ് കമ്മീഷ്ണർ സ്ഥാനത്ത് നിന്ന് പുറത്താക്കണം. മോദിയെ ഓടി രക്ഷപ്പെടാൻ അനുവദിക്കില്ല.
ഗ്യാനേഷ് കുമാറിന് ശേഷം നിങ്ങളുടെ പുറകെ ഞങ്ങള്‍ വരും. നിയമനടപടി സ്വീകരിക്കും. രക്ഷപ്പെടാൻ ആകില്ല.
ലോക്സഭ തിരഞ്ഞെടുപ്പിന് ശേഷം 13.5 കോടി പേരെയാണ് വോട്ടർപട്ടികയില്‍ നിന്നും നീക്കം ചെയ്തത്. അതായത് ഏഴ് പേരില്‍ ഒരാള്‍ പട്ടികയില്‍ നിന്ന് പുറത്താണ് അല്ലെങ്കില്‍ 15 ശതമാനം.
2024 ലെ നിയമസഭ തിരഞ്ഞെടുപ്പില്‍ പ്രതിപക്ഷവും എൻഡിഎയും തമ്മിലുള്ള വോട്ട് വ്യത്യാസം വെറും 3 ശതമാനം മാത്രമായിരുന്നു. അതൊരു നിയമവിരുദ്ധ തിരഞ്ഞെടുപ്പായിരുന്നു, വോട്ട് മോഷ്ടിക്കപ്പെട്ട തിരഞ്ഞെടുപ്പായിരുന്നു.
ഇതൊരു സാധാരണമോഷണമല്ല. ഒരു കടയില്‍ നിന്നും സാധാനം മോഷ്ടിക്കുന്നത് പോലെ അല്ല. ജനങ്ങളുടെ ശബ്ദമാണ് അപഹരിക്കപ്പെട്ടത്. ഇത് അപൂർവ്വങ്ങളില്‍ അപൂർവ്വമായ സംഭവമാണ്. ഇത് രാജ്യദ്രോഹമാണ്.
ഈ കാണുന്നത് രാഷ്ട്രീയ പാർട്ടികളുടെ ശബ്ദമല്ല, മറിച്ച്‌ ഇന്ത്യയിലെ യുവാക്കളുടേയും കർഷകരുടേയും ശബ്ദമാണ്. ഗ്യാനേഷ് കുമാർ ജയിലില്‍ പോകുക തന്നെ ചെയ്യും. ഗ്യാനേഷ് കുമാർ ഇല്ലാതെ നരേന്ദ്ര മോദിക്ക് പ്രധാനമാന്ത്രിയാകാനും അമിത് ഷായ്ക്ക് ആഭ്യന്തര മന്ത്രിയാകാനും സാധിക്കില്ല', രാഹുല്‍ ഗാന്ധി പറഞ്ഞു.
