ഡൽഹി : ഡൽഹിയിൽ ഇന്ന് അണിനിരന്ന ജനസാഗരം പ്രധാനമന്ത്രിക്കുള്ള സന്ദേശമാണെന്ന് പ്രതിപക്ഷ നേതാവ് രാഹുൽ ഗാന്ധി. വര്‍ഷങ്ങളായി രാജ്യത്ത് വോട്ടുകൊള്ള നടക്കുന്നു. ജനാധിപത്യം ഇല്ലാതാക്കാന്‍ അനുവദിക്കില്ല. ഭരണഘടനയെക്കാള്‍ വലുതല്ല ബിജെപിയെന്നും, ഈ ജനസാഗരം പ്രധാനമന്ത്രിക്കുള്ള സന്ദേശമെന്നും രാഹുല്‍ ഗാന്ധി പറഞ്ഞു. പരിപാടിയില്‍ പങ്കെടുത്തവര്‍ക്ക് രാഹുല്‍ ഗാന്ധി നന്ദി പറഞ്ഞു.
ഇതൊരു പാര്‍ട്ടിയുടെ മാത്രം പോരാട്ടമല്ല. എല്ലാ വിഭാഗത്തില്‍പ്പെട്ട ജനങ്ങളുടെയും ശബ്ദമാണ്. ഇന്ത്യയില്‍ ജനാധിപത്യത്തെ അവസാനിപ്പിക്കാന്‍ അനുവദിക്കില്ല. ഇത് കേവലം രാഷ്ട്രീയ നേതാക്കളുടെ ശബ്ദമല്ല. രാജ്യത്തിന്റെ ശബ്ദം. ഭരണഘടനയ്ക്ക് മുകളിലല്ല ഒന്നും. രാജ്യത്ത് വര്‍ഷങ്ങളായി വോട്ടുകൊള്ള നടക്കുന്നു. 2024 പൊതു തെരഞ്ഞെടുപ്പില്‍ പിന്നാലെയാണ് 13 കോടി വോട്ടര്‍മാര്‍ പുറത്തായത്. 15 ശതമാനം വോട്ടര്‍മാര്‍ പുറത്തായി എന്നും രാഹുൽ ഗാന്ധി പറഞ്ഞു.
ഗ്യാനേഷ് കുമാര്‍ പുറത്താകും, ജയിലിലാകും, ഇത് സാധാരണ കൊള്ളയല്ല, രാജ്യത്തിന്റെ ജനങ്ങളുടെ ശബ്ദമാണ് കൊള്ളയടിച്ചതെന്നും രാഹുൽ ഗാന്ധി പറഞ്ഞു. ഗ്യാനേഷ് കുമാറില്ലാതെ നരേന്ദ്ര മോദി പ്രധാനമന്ത്രിയുമാകില്ല അമിത് ഷാ ആഭ്യന്തര മന്ത്രിയുമാകില്ല. ആര്‍എസ്എസ് എല്ലാ സ്ഥാപനങ്ങളും പിടിച്ചെടുത്തു. ജുഡീഷ്യറി വിദ്യാഭ്യാസം സിബിഐ തുടങ്ങിയ എല്ലാം ആര്‍എസ്എസ് സ്വാധീനത്തിലാണ്. രാജ്യത്തെ സമ്പത്ത് അദാനിയിലും അംബാനിയിലും ഒതുങ്ങുന്നു. യുവാക്കള്‍ക്ക് തൊഴില്‍ ഇല്ല. ജനങ്ങളിലേക്ക് ഒന്നും എത്തുന്നില്ല. ഇത്തരം ഒരു രാജ്യങ്ങമല്ല ഞങ്ങള്‍ക്ക് വേണ്ടത്. ജനങ്ങള്‍ക്ക് അവരുടെ ക്ഷേമത്തിനായി സംവിധാനങ്ങള്‍ പ്രവര്‍ത്തിക്കണമെന്നും രാഹുൽ ഗാന്ധി പറഞ്ഞു.
