തിരുവനന്തപുരം: ഊരാളുങ്കല്‍ ലേബർ കോണ്‍ട്രാക്‌ട് കോ ഓപ്പറേറ്റീവ് സൊസൈറ്റി (യുഎല്‍സിസിഎസ്) ഏറ്റെടുത്ത നിർമ്മാണപ്രവൃത്തികള്‍ വൈകുന്നതില്‍ അന്ത്യശാസനവുമായി പൊതുമരാമത്ത് വകുപ്പ് മന്ത്രി പി കെ ബഷീർ.
നിർമ്മാണപ്രവൃത്തികള്‍ ഫെബ്രുവരിക്കകം പൂർത്തിയാക്കണമെന്നാണ് മന്ത്രിയുടെ അന്ത്യശാസനം. ഊരാളുങ്കല്‍ ഏറ്റെടുത്ത പ്രവൃത്തികള്‍ ഇഴഞ്ഞുനീങ്ങുന്നതില്‍ പൊതുമരാമത്ത് മന്ത്രിക്ക് കടുത്ത അതൃപ്തിയാണുള്ളത്.
പൊതുമരാമത്ത് വകുപ്പിന്റെ 1600 കോടി രൂപയുടെയും കിഫ്ബിയുടെ 1500 കോടി രൂപയുടെയും കെഎസ്ടിപിയുടെ 700 കോടി രൂപയുടെയും പദ്ധതികളാണ് പൂർത്തിയാകാതെ നീണ്ടുപോകുന്നത്. കോഴിക്കോട്, വയനാട്, പാലക്കാട് ജില്ലകളിലെ നിർമ്മാണപ്രവർത്തനങ്ങളാണ് കൂടുതലായും തടസ്സപ്പെട്ടിരിക്കുന്നത്.
ഫ്ലൈഓവറുകള്‍, പാലങ്ങള്‍, റോഡുകള്‍ തുടങ്ങിയവയുടെ നിർമ്മാണങ്ങള്‍ ഇഴഞ്ഞുനീങ്ങുകയാണ്. ഏറ്റെടുത്ത മുഴുവൻ പ്രവൃത്തികളും ഫെബ്രുവരി മാസത്തിനകം പൂർത്തിയാക്കണമെന്നാണ് മന്ത്രി ഊരാളുങ്കലിന് നല്‍കിയ കർശന നിർദേശം.
കേരളത്തിലെ പദ്ധതികള്‍ പൂർത്തിയാക്കാതെ മറ്റ് സംസ്ഥാനങ്ങളില്‍ വൻതോതില്‍ നിർമ്മാണ പ്രവർത്തനങ്ങള്‍ ഏറ്റെടുക്കുന്നതിലും മന്ത്രി അതൃപ്തി രേഖപ്പെടുത്തി. കഴിഞ്ഞ ദിവസം വിളിച്ചുചേർത്ത പദ്ധതി അവലോകന യോഗത്തിലായിരുന്നു മന്ത്രിയുടെ വിമർശനവും കർശന നിർദേശവും.
