ചെങ്ങന്നൂര്‍: കുറിച്ചിയില്‍ ഓടിക്കൊണ്ടിരുന്ന ട്രെയിനിനുനേരേ കല്ലെറിഞ്ഞ സംഭവത്തില്‍ പ്രായപൂര്‍ത്തിയാകാത്ത മൂന്നുപേര്‍ പിടിയില്‍.
ശനിയാഴ്ച വൈകീട്ട് അഞ്ചിനു ഷാലിമാര്‍-നാഗര്‍കോവില്‍ ഗുരുദേവ് എക്‌സ്പ്രസിനു നേരേ് കല്ലെറിഞ്ഞവരെയാണ് റെയില്‍വേ സംരക്ഷണസേന പിടികൂടിയത്.
ചിങ്ങവനം, ചങ്ങനാശ്ശേരി സ്റ്റേഷനുകള്‍ക്കിടയില്‍ കുറിച്ചിയില്‍വെച്ചാണ് കല്ലേറുണ്ടായത്.
കല്ലേറില്‍ ജനറേറ്റര്‍ കോച്ചിന്റെ ഗ്ലാസ് തകര്‍ന്നു.
വനിതാ ഗാര്‍ഡിന്റെ തൊട്ടടുത്താണ് കല്ലു വീണതെങ്കിലും ആര്‍ക്കും പരിക്കേറ്റില്ല. തുടര്‍ന്ന്, ട്രെയിന്‍ ചങ്ങനാശ്ശേരി സ്റ്റേഷനില്‍ നിര്‍ത്തി സ്റ്റേഷന്‍ മാസ്റ്ററെ വിവരമറിയിച്ചതിനുശേഷമാണ് യാത്ര തുടര്‍ന്നത്.
സംഭവമറിഞ്ഞ് ചെങ്ങന്നൂരില്‍ നിന്ന് ആര്‍.പി.എഫും ചിങ്ങവനം പോലീസും സ്ഥലത്തെത്തി അന്വേഷണം നടത്തുകയും കല്ലെറിഞ്ഞവരെ തിരിച്ചറിയുകയും ചെയ്തു. തുടര്‍ന്ന്, മൂന്നുപേരും രക്ഷിതാക്കള്‍ക്കൊപ്പം ആര്‍.പി.എഫ്. സ്റ്റേഷനില്‍ ഹാജരായി.
കൗതുകത്തിനാണ് കല്ലെറിഞ്ഞതെന്നാണ് ഇവര്‍ നല്‍കിയ മറുപടിയെന്നും അധികൃതര്‍ പറഞ്ഞു. ഇവരെ കോട്ടയം ജുവനൈല്‍ ജസ്റ്റിസ് ബോര്‍ഡിനു മുന്നില്‍ ഹാജരാക്കിയശേഷം ജാമ്യത്തില്‍ രക്ഷിതാക്കള്‍ക്കൊപ്പം വിട്ടു. റെയില്‍വേ ആക്‌ട് പ്രകാരമുള്ള നിയമനടപടികള്‍ ഇവര്‍ക്കെതിരേ തുടരുമെന്ന് ചെങ്ങന്നൂര്‍ ആര്‍.പി.എഫ്. അറിയിച്ചു.
