കാലടി: കാലടി സർവകലാശാലയിലെ അധ്യാപക നിയമനങ്ങളുമായി ബന്ധപ്പെട്ട് വിശദീകരണം തേടി സംസ്ഥാന ഓഡിറ്റ് വകുപ്പ്.
2021ല്‍ നടത്തിയ 19 അസിസ്റ്റന്റ് പ്രൊഫസർ നിയമനങ്ങളിലാണ് ഓഡിറ്റ് വകുപ്പ് നോട്ടീസ് അയച്ചത്.
സർക്കാർ അനുമതിയില്ലാതെയാണോ നിയമനങ്ങള്‍ നടത്തിയതെന്ന സംശയത്തെ തുടർന്നാണ് നടപടി.
നിയമനങ്ങളില്‍ സംവരണ മാനദണ്ഡങ്ങള്‍ കൃത്യമായി പാലിച്ചിട്ടുണ്ടോയെന്നും ഓഡിറ്റ് വകുപ്പ് പരിശോധിക്കുന്നുണ്ട്. മുൻ മന്ത്രി എം.പി രാജേഷിന്റെ ഭാര്യ നിനിത ആർ. ഉള്‍പ്പെടെയുള്ളവരുടെ നിയമനങ്ങള്‍ നേരത്തേ വിവാദമായിരുന്നു.
മലയാളം, സംസ്കൃതം തുടങ്ങി വിവിധ വിഭാഗങ്ങളിലായിരുന്നു നിയമനങ്ങള്‍.
നിയമനങ്ങള്‍ക്ക് സംസ്ഥാന സർക്കാരിന്റെ അംഗീകാരം ലഭിച്ചിട്ടുണ്ടോയെന്ന് വ്യക്തമാക്കുന്ന രേഖകള്‍ ഹാജരാക്കാനാണ് സർവകലാശാലയോട് ആവശ്യപ്പെട്ടിരിക്കുന്നത്.
ഇന്റർവ്യൂ മാർക്കുകള്‍, സംവരണ റോസ്റ്റർ എന്നിവ പാലിച്ചാണോ നിയമനം നടത്തിയതെന്നും വ്യക്തമാക്കണം.
അതേസമയം, നിയമനങ്ങളില്‍ ഗുരുതര ക്രമക്കേടുകള്‍ നടന്നെന്ന ആരോപണവുമായി ഉന്നതവിദ്യാഭ്യാസ വകുപ്പ് മന്ത്രി റോജി എം. ജോണ്‍ രംഗത്തെത്തി.
സർക്കാരിന്റെ അനുമതിയില്ലാതെ ചിലരുടെ താല്‍പ്പര്യം സംരക്ഷിക്കാൻ വേണ്ടിയാണ് നിയമനങ്ങള്‍ നടത്തിയതെന്നാണ് മന്ത്രിയുടെ ആരോപണം. വിദ്യാർഥികള്‍ക്ക് ലഭിക്കേണ്ട അടിസ്ഥാന സൗകര്യങ്ങള്‍ക്കുള്ള ഫണ്ടാണ് ഇതിനായി വഴിമാറ്റി ചെലവഴിച്ചതെന്നും മന്ത്രി പറഞ്ഞു.
