കൊച്ചി: കാലടി സംസ്‌കൃത സര്‍വകലാശാലാ വിദ്യാര്‍ഥികളുടെ പരീക്ഷാ അനുമതി റദ്ദാക്കണം എന്നാവശ്യപ്പെട്ട് നല്‍കിയ അപ്പീലില്‍ ഹൈക്കോടതി ഡിവിഷൻ ബെഞ്ച് ഇന്ന് വിധി പറയും.
വൈസ് ചാൻസിലർ സിസ തോമസ് നല്‍കിയ അപ്പീലില്‍ ജസ്റ്റിസുമാരായ അനില്‍ കെ.നരേന്ദ്രൻ, എസ്.മുരളീകൃഷ്ണ എന്നിവർ ഉള്‍പ്പെട്ട ഡിവിഷൻ ബെഞ്ച് ഉച്ചയ്ക്ക് രണ്ട് മണിക്കാണ് വിധി പറയുന്നത്.
സിംഗിള്‍ ബെഞ്ചിൻ്റെ ഇടക്കാല ഉത്തരവ് ഡിവിഷൻ ബെഞ്ച് റദ്ദാക്കിയില്ലെങ്കില്‍ വിസിക്ക് തിരിച്ചടിയാകും.
മറുപടി നല്‍കാൻ അവസരം ലഭിക്കാതെ ഉപഹർജിയില്‍ സിംഗിള്‍ ബെഞ്ച് തീരുമാനമെടുത്തുവെന്നാണ് വിസിയുടെയും സർവകലാശാലയുടെയും വാദം.
അപ്പീല്‍ നല്‍കിയ വിദ്യാർഥികളില്‍ പലർക്കും പരീക്ഷ എഴുതാൻ മതിയായ അറ്റൻഡൻസ് ഇല്ല. പരീക്ഷയ്ക്ക് സൂപ്പർ ഫൈൻ അടച്ച്‌ അപേക്ഷിക്കാൻ ഉള്ള സമയപരിധിയും അവസാനിച്ചു.
വിസിയെ ആക്രമിച്ച കേസിലെ പ്രതികള്‍ക്ക് പരീക്ഷ എഴുതാൻ അവസരം നല്‍കുന്നത് അന്വേഷണത്തെയും സർവകലാശാലയിലെ അന്തരീക്ഷത്തെയും ബാധിക്കും എന്നുമാണ് സർവകലാശാല ഉയർത്തിയ വാദം.
പരീക്ഷ എഴുതാന്‍ മതിയായ ഹാജര്‍ ഉണ്ടായിരുന്നുവെന്നാണ് വിദ്യാര്‍ഥികള്‍ നല്‍കിയ മറുപടി. ജയിലില്‍ കഴിയുന്നവരെ പോലും പരീക്ഷ എഴുതാന്‍ അനുവദിക്കാറുണ്ട്. എങ്ങനെയാണ് ഒരു സര്‍വകലാശാലക്ക് ഇങ്ങനെ ചെയ്യാന്‍ സാധിക്കുന്നത്.
വിദ്യാര്‍ഥികള്‍ അക്രമം നടത്തിയതിന് തെളിവില്ല എന്നാണ് അന്വേഷണ റിപ്പോര്‍ട്ട് എന്നും വിദ്യാര്‍ഥികള്‍ ഹൈക്കോടതിയെ അറിയിച്ചിട്ടുണ്ട്.
