കഴക്കൂട്ടം: ഇസ്രയേലിലേക്ക് വിനോദസഞ്ചാരയാത്ര വാഗ്ദാനം ചെയ്ത് കഴക്കൂട്ടം സ്വദേശിയില്നിന്നും സുഹൃത്തുക്കളില്നിന്നുമായി 21.97 ലക്ഷത്തിലധികം രൂപ തട്ടിയെടുത്തതായി പരാതി.
സംഭവത്തില് ബെംഗളൂരു ആസ്ഥാനമായി പ്രവര്ത്തിക്കുന്ന ടൂര് സ്ഥാപനത്തിനെതിരേ പോലീസ് കേസെടുത്തു.
കഴക്കൂട്ടം മേനംകുളം ജെ.ജെ. കോട്ടേജില് ജയപാലന് റൊസാരിയോയുടെ (54) പരാതിയിലാണ് നടപടി. കഴിഞ്ഞ മേയ് മുതല് ബാങ്ക് അക്കൗണ്ട് വഴി 21,47,500 രൂപയും ഗൂഗിള് പേ വഴി 50,000 രൂപയും ഉള്പ്പെടെ ആകെ 21,97,500 രൂപയാണ് ഏജന്സി കൈപ്പറ്റിയത്.
പണം സ്വീകരിച്ചശേഷം യാത്ര അയയ്ക്കുകയോ നല്കിയ തുക തിരികെനല്കുകയോ ചെയ്യാതെ വിശ്വാസവഞ്ചന കാണിച്ചെന്നാണ് പരാതി. സംഭവത്തില് കഴക്കൂട്ടം പോലീസും അന്വേഷണം ആരംഭിച്ചിട്ടുണ്ട്.
