കോഴിക്കോട്: രാമനാട്ടുകരയിലെ മുട്ടിയറയിൽ ചാലിയാറിന്റെ കൈവഴിയിൽ വിഷം കലക്കി മീൻപിടിക്കാൻ ശ്രമിച്ച സംഭവത്തിൽ മീനുകൾ കൂട്ടത്തോടെ ചത്തുപൊങ്ങി. സംഭവം ശ്രദ്ധയിൽപ്പെട്ടതോടെ നാട്ടുകാർ സ്ഥലത്തെത്തിയപ്പോൾ മീൻപിടുത്തത്തിന് എത്തിയ മൂന്നംഗ സംഘം ഓടിരക്ഷപ്പെട്ടു.
ഇന്ന് രാവിലെയായിരുന്നു സംഭവം. ചാലിയാറിന്റെ കൈവഴിയിൽ വിഷം കലക്കി വലവീശി മീൻപിടിക്കാനായിരുന്നു സംഘത്തിന്റെ ശ്രമം. നാട്ടുകാർ കണ്ടതോടെ സംഘം സ്ഥലത്തുനിന്ന് രക്ഷപ്പെടുകയായിരുന്നു. ഇവർ എത്തിയ ഓട്ടോറിക്ഷ സംഭവസ്ഥലത്ത് ഉപേക്ഷിച്ച നിലയിൽ കണ്ടെത്തി. സമീപത്ത് നിന്ന് വിഷക്കുപ്പികളും കണ്ടെത്തിയിട്ടുണ്ട്.
കുടിവെള്ള ആവശ്യങ്ങൾക്കും അലക്കുന്നതിനും ഉൾപ്പെടെ പ്രദേശവാസികൾ ഉപയോഗിക്കുന്ന വെള്ളത്തിലാണ് വിഷം കലർത്തിയതെന്നാണ് നാട്ടുകാർ ആരോപിക്കുന്നത്. നാട്ടുകാർ നൽകിയ പരാതിയുടെ അടിസ്ഥാനത്തിൽ പ്രതികളെ തിരിച്ചറിഞ്ഞ് പിടികൂടാനുള്ള അന്വേഷണം പൊലീസ് ഊർജിതമാക്കിയിട്ടുണ്ട്.
