തിരുവനന്തപുരം: സംസ്ഥാനത്തെ ബാർ ലൈസൻസുകളടക്കമുള്ള നടപടികളില്‍ വിജിലൻസ് അന്വേഷണത്തിന് ശുപാർശ.
മന്ത്രി എം.ലിജു മുഖ്യമന്ത്രിക്ക് ഫയല്‍ കൈമാറി. ഉത്തരവ് വൈകാതെ ഉണ്ടാകും. സാംബശിവറാവു എക്സൈസ് കമ്മീഷണറായിരുന്ന കാലഘട്ടത്തിലെ എല്ലാ നടപടികളും അന്വേഷണ പരിധിയിലേക്ക് എത്തും.
സാംബശിവറാവു എക്സൈസ് കമ്മീഷണറായിരിക്കുന്ന കാലഘട്ടത്തില്‍ ബാർ ലൈസൻസുകള്‍ അനുവദിച്ചതും പുതുക്കിയതുമായ മുഴുവൻ നടപടികളും വിജിലൻസ് അന്വേഷിക്കാൻ ആണ് ശുപാർശ. എക്സൈസ് മന്ത്രി എം. ലിജു മുഖ്യമന്ത്രിക്ക് ഫയല്‍ കൈമാറി.
മുഖ്യമന്ത്രി ശുപാർശ ചെയ്ത് ഫയല്‍ ആഭ്യന്തര വകുപ്പിന് കൈമാറുന്നതോടെ വിജിലൻസ് അന്വേഷണത്തിന് ഉത്തരവുണ്ടാകും. ഇന്നലെയാണ് എക്സൈസ് മന്ത്രി മുഖ്യമന്ത്രിക്ക് ഫയല്‍ കൈമാറിയത്.
ഇന്ന് തന്നെ മുഖ്യമന്ത്രി വിജിലൻസ് അന്വേഷണത്തിന് ശുപാർശ ചെയ്ത് ഫയല്‍ ആഭ്യന്തര വകുപ്പിന് കൈമാറും. ഐഎഎസ് ഉദ്യോഗസ്ഥൻ ഉള്‍പ്പെടെയുള്ളവർക്കെതിരെ പ്രാഥമിക അന്വേഷണം നടത്താൻ സർക്കാരിന്റെ മുൻകൂർ അനുമതി ആവശ്യമാണ്.
ഈ അനുമതി ഇന്ന് നല്‍കും. സാംബശിവ റാവുവിന്റെ റിപ്പോർട്ടിലെ പരാമർശങ്ങളും അന്വേഷണ പരിധിയില്‍ വരും. രണ്ട് ഉന്നത ഉദ്യോഗസ്ഥർക്ക് ബാർ ഉടമകളുമായി പണമിടപാടുണ്ടെന്നായിരുന്നു റിപ്പോർട്ടിലെ പ്രധാന ആരോപണം.
കഴിഞ്ഞ സർക്കാരിന്റെ കാലത്ത് ശരവേഗത്തില്‍ ബാർ ലൈസൻസുകള്‍ അനുവദിച്ചതുമായി ബന്ധപ്പെട്ടും പ്രത്യേക അന്വേഷണം ഉണ്ടാകും.
