തിരുവനന്തപുരം: കാസർകോട് നടന്ന ഔദ്യോഗിക പരിപാടിയില്‍ ദേശീയ ഗാനമായ വന്ദേമാതരം പൂർണമായി പാടിത്തീരുന്നതിന് മുൻപ് മന്ത്രി കെ. മുരളീധരനും ജില്ലാ കളക്ടർ ശ്രീധന്യ സുരേഷും ഉള്‍പ്പെടെയുള്ള പ്രമുഖർ ഇരുന്ന സംഭവം രാഷ്ട്രീയ വിവാദമാകുന്നു.
വന്ദേമാതരത്തിന്റെ ആദ്യ രണ്ട് ചരണങ്ങള്‍ക്ക് ശേഷം ഇരുന്നതിലൂടെ കളക്ടർ ദേശീയ പ്രോട്ടോകോള്‍ ലംഘിച്ചുവെന്ന് ആരോപിച്ച്‌ കേന്ദ്ര ആഭ്യന്തരമന്ത്രി അമിത് ഷാ, കേരള ഗവർണർ, സംസ്ഥാന സർക്കാർ എന്നിവർക്ക് പരാതി നല്‍കാൻ ബിജെപി തീരുമാനിച്ചു.
കാസർകോട് മുളിയാർ ഫാമിലി ഹെല്‍ത്ത് സെന്ററിലെ ലാബ് ഉദ്ഘാടന ചടങ്ങിലാണ് സംഭവം നടന്നത്. മന്ത്രിമാർക്കോ എംഎല്‍എമാർക്കോ രാഷ്ട്രീയ നിലപാടുകള്‍ ഉണ്ടാകാം, എന്നാല്‍ ഒരു ഐഎഎസ് ഉദ്യോഗസ്ഥ എന്ന നിലയില്‍ കേന്ദ്ര സർക്കാരിന്റെ ചട്ടങ്ങള്‍ പാലിക്കാൻ കളക്ടർ ബാധ്യസ്ഥയാണെന്ന് ബിജെപി ചൂണ്ടിക്കാട്ടി.
ദേശീയ ബഹുമാനത്തെ അപമാനിക്കുന്നത് തടയുന്ന നിയമപ്രകാരം നടപടി വേണമെന്നാണ് ആവശ്യം.
ഔദ്യോഗിക നോട്ടീസില്‍ ഈശ്വരപ്രാർത്ഥന മാത്രമാണ് ഉണ്ടായിരുന്നതെന്നും വന്ദേമാതരം പൂർണമായി ആലപിക്കുമെന്ന് മുൻകൂട്ടി അറിയിച്ചിരുന്നില്ലെന്നും മന്ത്രി കെ. മുരളീധരൻ വ്യക്തമാക്കി.
സംസ്ഥാന സർക്കാരിന്റെ പരിപാടികളില്‍ വന്ദേമാതരത്തിന്റെ ആദ്യ രണ്ട് ചരണങ്ങള്‍ മാത്രമാണ് ഉള്‍പ്പെടുത്താറുള്ളതെന്നും അദ്ദേഹം കൂട്ടിച്ചേർത്തു.
എം.പി രാജ്മോഹൻ ഉണ്ണിത്താൻ, എംഎല്‍എ കെ. മാഹിൻ, കളക്ടർ എന്നിവരാണ് ആദ്യ രണ്ട് ചരണങ്ങള്‍ക്ക് ശേഷം ഇരുന്നത്.
എന്നാല്‍ എംഎല്‍എ കെ. നീലകണ്ഠൻ, ഡിസിസി പ്രസിഡന്റ് പി.കെ. ഫൈസല്‍ എന്നിവർ ഗാനം പൂർത്തിയാകുന്നതുവരെ എഴുന്നേറ്റു നിന്നു.
