അമ്പലപ്പുഴ: അമ്പലപ്പുഴയില് ട്രെയിൻ തട്ടി ഒന്നര വയസ്സുകാരൻ മരിച്ച സംഭവത്തില് ദുരൂഹതയെന്ന് നാട്ടുകാർ.
അമ്പലപ്പുഴ വടക്ക് പഞ്ചായത്ത് 15-ാം വാർഡ് വളഞ്ഞവഴി സ്വദേശികളായ പുതുവല് വിനീതിന്റെയും സൂര്യ ബാബുവിന്റെയും മകൻ തൃണവ് ആണ് മരിച്ചത്. റെയില്വേ ട്രാക്കിനോട് ചേർന്നുള്ള ബന്ധുവീട്ടിലായിരുന്നു കുട്ടി. മുത്തശ്ശി കുളിക്കാൻ പോയപ്പോള് ബന്ധുവീട്ടില് ഏല്പ്പിച്ചതായിരുന്നു.
ഈ വീട്ടില് നിന്ന് കാണാതായ കുട്ടിയെ, വീട്ടില് നിന്ന് കുറച്ച് അകലെയായി റെയില്വേ ട്രാക്കില് ട്രെയിൻ തട്ടി മരിച്ച നിലയിലാണ് കണ്ടെത്തിയത്. ഈ പ്രദേശത്തെ വീടുകളില് നിന്ന് ചെങ്കുത്തായ ചെറിയ കയറ്റം കയറി വേണം റെയില്വേ ട്രാക്കിലെത്താൻ. മഴ പെയ്തതിനാല് കുട്ടിയെ കാണാതായ സമയം ഈ വഴിയില് നനവും വഴുക്കലും ഉണ്ടായിരുന്നു.
മുതിർന്നവർക്ക് പോലും കയറാൻ പ്രയാസമുള്ള കയറ്റത്തിലൂടെ ചുരുങ്ങിയ സമയത്തിനുള്ളില് കുട്ടി എങ്ങനെ നടന്നു കയറി അപകട സ്ഥലത്തെത്തി എന്നത് നാട്ടുകാർക്ക് സംശയമുണ്ട്. ഉച്ചത്തിലുള്ള കരച്ചില് കേട്ട് ഓടിയെത്തിയപ്പോള് കുഞ്ഞ് ട്രാക്കിലൂടെ നടക്കുന്നത് കണ്ടെന്നും, പെട്ടെന്ന് പാഞ്ഞെത്തിയ ട്രെയിൻ കുട്ടിയെ ഇടിക്കുകയായിരുന്നെന്നും സമീപവാസി പറഞ്ഞു.
വൈകിട്ട് ആറിന് കടന്നുപോയ പാസഞ്ചർ ട്രെയിൻ തട്ടിയാണ് കുട്ടി മരിച്ചത്. സംഭവത്തില് പൊലീസ് അന്വേഷണം ആരംഭിച്ചു. അപകടത്തിലെ ദുരൂഹത നീക്കണമെന്നാണ് നാട്ടുകാരുടെ ആവശ്യം. അപകട സമയം മത്സ്യത്തൊഴിലാളിയായ പിതാവും സ്വകാര്യ ആശുപത്രി ജീവനക്കാരിയായ മാതാവും ജോലിക്ക് പോയിരിക്കുകയായിരുന്നു. ഈ സമയം കുഞ്ഞിനെ അമ്മ സൂര്യയുടെ വീട്ടിലാണ് ഏല്പ്പിച്ചിരുന്നത്.
