നാട്ടകത്ത് ബൈക്കിൽ ഇടിക്കാതിരിക്കാൻ വെട്ടിച്ചു മാറ്റിയ ആംബുലൻസ് തലകീഴായി മറിഞ്ഞു; രോഗി അത്ഭുതകരമായി രക്ഷപ്പെട്ടു; ബൈക്ക് യാത്രക്കാരനും ആംബുലൻസ് ഡ്രൈവർക്കും രോഗിയ്‌ക്കൊപ്പമുണ്ടായിരുന്നയാൾക്കും പരിക്കേറ്റു

സ്വന്തം ലേഖിക

നാട്ടകം: നാട്ടകത്ത് അപ്രതീക്ഷിതമായി എത്തിയ ബൈക്കിൽ ഇടിക്കാതിരിക്കാൻ വെട്ടിച്ചു മാറ്റിയ ആംബുലൻസ് തലകീഴായി മറിഞ്ഞു.

അപകടത്തിൽ നിന്നും ആംബുലൻസിൽ ഉണ്ടായിരുന്ന രോഗി രക്ഷപ്പെട്ടു. ആംബുലൻസ് ബൈക്കിൽ തട്ടി ബൈക്ക് യാത്രക്കാരനും ആംബുലൻസ് ഡ്രൈവർക്കും, രോഗിയ്‌ക്കൊപ്പമുണ്ടായിരുന്നയാൾക്കും പരിക്കേറ്റു.

ശനിയാഴ്ച വൈകിട്ട് നാലരയോടെയായിരുന്നു അപകടം. എം സി റോഡിൽ നാട്ടകം വില്ലേജ് ഓഫീസിന് സമീപത്താണ് അപകടമുണ്ടായത്. പത്തനാപുരത്തു നിന്നും, കോട്ടയം മെഡിക്കൽ കോളേജ് ആശുപത്രിയിലേയ്ക്കു പോകുകയായിരുന്നു ആംബുലൻസ്.

ചിങ്ങവനം ഭാഗത്ത് നിന്നും എത്തിയ ആംബുലൻസിന് കുറുകെ ബൈക്ക് വരികയായിരുന്നു. ഈ ബൈക്ക് യാത്രക്കാരനെ രക്ഷിക്കാൻ, പെട്ടെന്ന് ആംബുലൻസ് ഡ്രൈവർ ബ്രേക്ക് പിടിക്കുകയായിരുന്നു.

റോഡിൽ തലകീഴായി മറിഞ്ഞ ആംബുലൻസ്, റോഡിൽ തന്നെ നേരെ നിന്നു. ഈ സമയം ആംബുലൻസ് ഡ്രൈവർ വണ്ടിയ്ക്കുള്ളിൽ നിന്നും ചാടിയിറങ്ങി.

അപകടത്തെ തുടർന്ന് ഓടിക്കൂടിയ നാട്ടുകാർ ചേർന്ന് പരിക്കേറ്റവരെ ആശുപത്രിയിലേയ്ക്കു മാറ്റി. ആംബുലൻസിനുള്ളിലുണ്ടായിരുന്ന രോഗിയെ, മറ്റൊരു ആംബുലൻസിൽ മെഡിക്കൽ കോളേജ് ആശുപത്രിയിലേയ്ക്കു മാറ്റി.