ജലനിരപ്പ് താഴുന്നില്ല; മുല്ലപ്പെരിയാറില്‍ കൂടുതല്‍ ഷട്ടറുകള്‍ തുറന്നു; പ്രളയഭീതി ഇല്ലെന്ന് അധികൃതര്‍
സ്വന്തം ലേഖിക
ഇടുക്കി: കനത്ത മഴയില്‍ നീരൊഴുക്ക് വര്‍ദ്ധിച്ചതോടെ മുല്ലപ്പെരിയാര് അണക്കെട്ടിന്റെ കൂടുതല്‍ ഷട്ടറുകള്‍ തുറന്നു.
ജലനിരപ്പ് 137.70 അടിയായതോടെയാണ് അണക്കെട്ടിന്റെ നാല് ഷട്ടറുകള്‍ കൂടി തുറന്നത്. നേരത്തെ തുറന്ന ഷട്ടറുകള്‍ക്ക് പുറമേയാണിത്. ഇതോടെ മുല്ലപ്പെരിയാര് അണക്കെട്ടില്‍ തുറന്ന ഷട്ടറുകളുടെ എണ്ണം പത്തായി.
Whatsapp Group 1 | Whatsapp Group 2 |Telegram Group
സംസ്ഥാനത്ത് പുഴകളിലെ നീരൊഴുക്ക് കൂടിയതോടെ നിരവധി ഡാമുകളുടെ ഷട്ടറുകളും തുറന്നു. മലമ്പുഴ അണക്കെട്ടിന്റെ നാല് ഷട്ടറുകളും, തെന്മല ഡാമിന്റെ മൂന്ന് ഷട്ടറുകളും തുറന്നപ്പോള്‍ നേരത്തെ തുറന്ന പീച്ചി ഡാമിന്റെ ഷട്ടറുകള്‍ കൂടുതല്‍ ഉയര്‍ത്തുകയും ചെയ്തു. കരുതലോടെയാണ് ഇത്തവണ അണക്കെട്ടുകള്‍ തുറന്നത് എന്നതിനാല്‍ പ്രളയഭീതിയുടെ ആവശ്യമില്ലെന്ന് അധികൃതര്‍ വ്യക്തമാക്കി.
അതേസമയം സംസ്ഥാനത്ത് ഇന്ന് മഴയ്ക്ക് നേരിയ ശമനമുണ്ടായത് തെല്ലൊരാശ്വാസം നല്‍കിയിട്ടുണ്ട്. ഇടുക്കി മുതല്‍ കാസര്‍കോടുവരെ എട്ട് ജില്ലകളില്‍ ഓറഞ്ച് അലര്‍ട്ട് തുടരുകയാണ്. തിരുവനന്തപുരത്തും കൊല്ലത്തും അലര്‍ട്ടുകള്‍ പിന്‍വലിച്ചു. പത്തനംതിട്ടയിലും ആലപ്പുഴയിലും കോട്ടയത്തും എറണാകുളത്തും യെല്ലോ അലേര്‍ട്ട് മാത്രമാണുള്ളത്.
വിവിധ ജില്ലകളിലായി ഏഴായിരത്തോളംപേര്‍ 221 ദുരിതാശ്വാസ ക്യാമ്പുകളിലായി കഴിയുകയാണ്.
നേരത്തെ ജലനിരപ്പ് 137.45 അടിയെത്തിയപ്പോഴാണ് മുല്ലപ്പെരിയാര് അണക്കെട്ടിന്റെ മൂന്ന് ഷട്ടറുകള്‍ 30 സെന്റീമീറ്റര്‍ വീതം ഉയര്‍ത്തിയത്. സെക്കന്‍ഡില്‍ 534 ഘനയടി വെള്ളമായിരുന്നു പുറത്തേക്കൊഴുക്കിയത്. രണ്ട് മണിക്കൂറിന് ശേഷം 1000 ഘനയടി വെള്ളവും പുറത്തേക്ക് ഒഴുക്കി. എന്‍ ഡി ആര്‍ എഫ് സംഘം സ്ഥലത്തെത്തിയിട്ടുണ്ട്.
ജലവിഭവ വകുപ്പ് മന്ത്രി റോഷി അഗസ്റ്റിനും എം എല്‍ എയും അടക്കമുള്ളവര്‍ പ്രദേശത്ത് ക്യാമ്പ് ചെയ്യുന്നുണ്ട്.
പെരിയാര്‍ തീരത്ത് ജാഗ്രതാ നിര്‍ദേശം നല്‍കി. എന്നാല്‍ ആശങ്ക വേണ്ടെന്നും അധികൃതര്‍ അറിയിച്ചു. ജലനിരപ്പ് 136 അടി പിന്നിട്ടതോടെ നേരത്തെ ഷട്ടര്‍ തുറക്കുന്നതിനുള്ള ആദ്യഘട്ട മുന്നറിയിപ്പ് നല്‍കിയിരുന്നു. അതേസമയം, ഇടുക്കി അണക്കെട്ടിലെ ജലനിരപ്പ് 2380.32 അടിയായി. 2381.53 അടിയിലെത്തിയാല്‍ ഓറഞ്ച് അലര്‍ട്ട് പ്രഖ്യാപിക്കും. അണക്കെട്ടില്‍ കഴിഞ്ഞ വര്‍ഷത്തേക്കാള്‍ 10 അടി വെള്ളം കൂടുതലാണ്.
