സീറ്റിൽ ഒപ്പമിരുന്നശേഷം കോളേജ് വിദ്യാർഥിനിയെ കടന്നുപിടിക്കാൻ ശ്രമിച്ചു; എതിർത്തപ്പോൾ നഗ്നതാ പ്രദർശനം; തമിഴ്‌നാട് സ്വദേശി അറസ്റ്റിൽ

സ്വന്തം ലേഖകൻ

കൊല്ലം: കെ.എസ്.ആർ.ടി.സി. ബസിൽവെച്ച് കോളേജ് വിദ്യാർഥിനിയെ കടന്നുപിടിക്കാൻ ശ്രമിച്ച തമിഴ്‌നാട് സ്വദേശി അറസ്റ്റിൽ. കന്യാകുമാരി കളിയിക്കാവിള അമ്പെട്ടിൻകാല ജസ്റ്റിൻ ആൽവിൻ (43) ആണ് പോലീസ് പിടിയിലായത്.

ബുധനാഴ്ച രാവിലെ 8.30-ന് ചെങ്ങന്നൂരിലേക്ക് പോകുകയായിരുന്ന വേണാട് ബസിലായിരുന്നു സംഭവം.

സീറ്റിൽ ഒപ്പമിരുന്നശേഷം മയ്യത്തുംകര ജംങ്ഷനെത്തിയപ്പോൾ ഇയാൾ പെൺകുട്ടിയെ തുടരെ ശല്യംചെയ്യുകയായിരുന്നു. പ്രതികരിച്ചപ്പോൾ നഗ്‌നതാപ്രദർശനവും നടത്തി. തുടർന്ന് പെൺകുട്ടി പോലീസിനെ വിവരം അറിയിച്ചു.

യാത്രാമധ്യേ പോലീസ് പ്രതിയെ പിടികൂടി. പ്രതിയെ റിമാൻഡ് ചെയ്തതായി ശൂരനാട് ഇൻസ്‌പെക്ടർ ഗിരീഷ്‌കുമാർ പറഞ്ഞു.