400 രൂപയ്ക്ക് ഒരു പകല്‍ മുഴുവന്‍ കുട്ടനാടിന്റെ കായല്‍ സൗന്ദര്യം ആസ്വദിക്കാം… ആലപ്പുഴയിലേയ്ക്ക് വരൂ…
സ്വന്തം ലേഖകൻ
ആലപ്പുഴ: അഞ്ച് മണിക്കൂര്‍ കായല്‍ പരപ്പിലൂടെ ബോട്ടില്‍ കറങ്ങാന്‍ സൗകര്യം ഒരുക്കുകയാണ് സംസ്ഥാന ജല ഗതാഗത വകുപ്പിന്റെ ‘വേഗ – 2’.
2020 ഡിസംബറില്‍ സര്‍വീസ് ആരംഭിച്ച ബോട്ടിന് ഇപ്പോള്‍ സഞ്ചാരികള്‍ക്കിടയില്‍ വലിയ സ്വീകാര്യതയാണ് ലഭിച്ച്‌ വരുന്നത്. സാധാരണ സര്‍ക്കാര്‍ ബോട്ടുകളില്‍ നിന്ന് വ്യത്യസ്തമായി ബോട്ടിന്റെ മുന്‍ ഭാഗത്ത് നിന്ന് കുട്ടനാടിന്റെ കായല്‍ സൗന്ദര്യം ആസ്വദിക്കാനും വേഗ – 2 യില്‍ സൗകര്യമുണ്ട്.
Whatsapp Group 1 | Whatsapp Group 2 |Telegram Group
സര്‍ക്കാരിന്റെ കീഴിലുള്ള ഈ ബോട്ട് ദിവസവും 11.30 ന് ആലപ്പുഴയില്‍ നിന്നാണ് യാത്ര തിരിക്കുന്നത്. പുന്നമടക്കായലിലൂടെയും, വേമ്പനാട് കായലിലൂടെയുമാണ് സഞ്ചാരം. മുഹമ്മ, റാണി, ചിത്തിര, മാര്‍ത്താണ്ഡം, ആര്‍ ബ്ലോക്ക്‌, മംഗലശ്ശേരി, കുപ്പപ്പുറം വഴി തിരികെ 4.30 ന് ആലപ്പുഴയിലെത്തും.
പക്ഷി നിരീക്ഷകരുടെ പറുദീസയായ പാതിരാമണല്‍ ദ്വീപില്‍ ഇറങ്ങി കാഴ്ചകള്‍ കാണാനും വേഗ – 2 സൗകര്യമൊരുക്കുന്നുണ്ട്.
മലയാളി കുടുംബങ്ങളാണ് സഞ്ചാരികളില്‍ കൂടുതലുമെന്ന് ജല ഗതാഗതവകുപ്പ് ഉദ്യോഗസ്ഥര്‍ പറയുന്നു. കോവിഡ് നിയന്ത്രണങ്ങള്‍ ഒഴിഞ്ഞതോടെ വിദേശികളും എത്തുന്നുണ്ട്. വെക്കേഷന്‍ തുടങ്ങിയപ്പോള്‍ സീറ്റുകള്‍ മുഴുവന്‍ വളരെ വേഗം ബുക്കായി പോകുന്ന അവസ്ഥയുണ്ടെന്നും ഉദ്യോഗസ്ഥര്‍ പറഞ്ഞു.
നോണ്‍ എ സി യില്‍ യാത്ര ചെയ്യാന്‍ 400 രൂപയും, എ സി യില്‍ 600 രൂപയുമാണ് ടിക്കറ്റ് നിരക്ക്. 100 രൂപ കൂടി കൊടുത്താല്‍ കുടുംബശ്രീ ഒരുക്കുന്ന നല്ല നാടന്‍ ഭക്ഷണവും കഴിച്ച്‌ പോരാം.
മണിക്കൂറില്‍ 25 കിലോമീറ്റര്‍ ആണ് ബോട്ടിന്റെ വേഗം. 120 പേര്‍ക്ക് യാത്ര ചെയ്യാം. 40 എ സി സീറ്റും 80 നോണ്‍ എ സി സീറ്റുമുണ്ട്. ലൈഫ് ജാക്കറ്റുള്‍പ്പെടെയുള്ള സുരക്ഷാക്രമീകരണങ്ങളും ബോട്ടില്‍ ഒരുക്കിയിട്ടുണ്ട്.
സീറ്റ് ബുക്ക് ചെയ്യാന്‍…. 9400050322, 9400050325, 9400050327
