സ്വന്തം ലേഖകൻ
കണ്ണൂര്: ഡിവൈഎഫ്ഐയ്ക്കെതിരെ ഫെയ്സ്ബുക്ക് പോസ്റ്റുമായി കരിപ്പൂര് സ്വര്ണക്കടത്ത് കേസിലെ പ്രതി അര്ജുന് ആയങ്കി.
പൊതുമദ്ധ്യത്തിലേക്ക് കൊണ്ടുവന്ന് വീണ്ടും വിചാരണ ചെയ്യാനിടയാക്കുന്ന സാഹചര്യം സൃഷ്ടിക്കപ്പെടുമ്പോള് പ്രതികരിക്കാന് ഞാനും നിര്ബന്ധിതനായേക്കും. അപ്പോഴുണ്ടായേക്കാവുന്ന രാഷ്ട്രീയ സംഘര്ഷങ്ങള്ക്ക് ഉത്തരവാദിത്തം പറയേണ്ടത് ഇതിന് തുടക്കമിട്ടവരാണ് എന്നാണ് അര്ജുന് പോസ്റ്റില് പറയുന്നത്.
Whatsapp Group 1 | Whatsapp Group 2 |Telegram Group
മേയ് ഒന്നിന് നടത്തുമെന്ന് പറഞ്ഞിരുന്ന പത്രസമ്മേളനം താത്കാലികമായി ഉപേക്ഷിക്കുന്നതായും കുറിപ്പില് പറയുന്നുണ്ട്. ഡിവൈഎഫ്ഐ നേതാവായ മനു തോമസിനെ അപകീര്ത്തിപ്പെടുത്തുന്ന തരത്തില് സമൂഹമാദ്ധ്യമങ്ങളില് പോസ്റ്റ് വന്നതോടെ ഇതിന് പിന്നില് ലഹരിക്കടത്ത് സംഘങ്ങളാണെന്ന് ഡിവൈഎഫ്ഐ പ്രവര്ത്തകര് ആരോപിച്ചിരുന്നു.
തുടര്ന്ന് മേയ് ഒന്നിന് പത്രസമ്മേളനം നടത്തുമെന്ന് അര്ജുന് ആയങ്കി ഫെയ്സ്ബുക്ക് പോസ്റ്റിട്ടിരുന്നു. ആ പത്രസമ്മേളനമാണ് ഇപ്പോള് ഉപേക്ഷിച്ചതായി ഫെയ്സ്ബുക്കില് കുറിച്ചിരിക്കുന്നത്.
ഫെയ്സ്ബുക്കിന്റെ പൂര്ണരൂപം
ഒരു ജില്ലാ നേതാവ് ചാനലുകാര്ക്ക് വാര്ത്തകള് ചോര്ത്തിക്കൊടുക്കുന്നു എന്നതുമായി ബന്ധപ്പെട്ട ഒരു പോസ്റ്റില് ആ ജില്ലാ നേതാവിനെ മെന്ഷന് ചെയ്തു എന്നതിന്റെ അടിസ്ഥാനത്തില് ആണ് സംഘടന എനിക്കെതിരെ പരാതി കൊടുത്തിട്ടുള്ളത്.
പോസ്റ്റിട്ടയാള് ഞാനല്ല, മെന്ഷന് ചെയ്തു എന്നത് ഒഫന്സുമല്ല, എങ്കിലും മനഃപൂര്വ്വം എന്നെയും ഇതിലേക്ക് വലിച്ചിഴച്ച് മറ്റൊരു ദിശയിലേക്ക് വിഷയം കൊണ്ടെത്തിക്കുന്ന പ്രവണത ശരിയല്ല.
അങ്ങനെ വീണ്ടും വീണ്ടും എന്നെ പൊതുമദ്ധ്യത്തിലേക്ക് കൊണ്ടുവന്ന് വിചാരണ ചെയ്യാനിടയാക്കുന്ന സാഹചര്യം സൃഷ്ടിക്കപ്പെടുമ്പോള് പ്രതികരിക്കാന് ഞാനും നിര്ബന്ധിതനായേക്കും. അപ്പോഴുണ്ടായേക്കാവുന്ന രാഷ്ട്രീയ സംഘര്ഷങ്ങള്ക്ക് ഉത്തരവാദിത്വം പറയേണ്ടുന്നത് ഇതിന് തുടക്കമിട്ടവരാണ്.
നിങ്ങള്ക്ക് വിദ്വേഷമുണ്ടാവാം, അയിത്തം കല്പിച്ച തൊട്ടുകൂടായ്മയും തീണ്ടിക്കൂടായ്മയും ഉണ്ടാവാം. അതൊന്നും എന്നെ ബാധിക്കുന്ന വിഷയമല്ല. അനാവശ്യകാര്യങ്ങള്ക്ക് ഉപദ്രവിക്കാതിരിക്കുക, അതാര്ക്കും ഗുണം ചെയ്യുകയില്ല. കമ്മ്യൂണിസ്റ്റ് വിരുദ്ധര്ക്ക് ചാരപ്പണിയെടുക്കുന്ന പരിപാടി ഞാന് ചെയ്തിട്ടില്ല.
രാഷ്ട്രീയം ഉപജീവനമാര്ഗ്ഗം ആയിക്കാണുന്ന, രാഷ്ട്രീയ എതിരാളികളുമായി പങ്കു കച്ചവടം നടത്തുന്ന, അയിത്തം കല്പിച്ച അധോലോകത്തിലെ അതിഥികളായ അഭിനവ ആദര്ശ വിപ്ലവകാരികള് ആരൊക്കെയാണെന്ന് ചൂണ്ടിക്കാണിക്കാനും നില്ക്കുന്നില്ല. വെറുതെ എന്നെക്കൊണ്ട് പറയിപ്പിക്കരുത്. പത്രസമ്മേളനം താല്ക്കാലികമായി ഉപേക്ഷിക്കുന്നു.- ഇതായിരുന്നു അദ്ദേഹത്തിന്റെ കുറിപ്പ്.
