സ്വന്തം ലേഖകൻ
തിരുവനന്തപുരം: സംസ്ഥാനത്ത് വ്യാപകമായി മഴ തുടരുന്ന സാഹചര്യത്തില് എലിപ്പനിയ്ക്കെതിരെ ആരോഗ്യ വകുപ്പ് ‘മൃത്യഞ്ജയം’ എന്നപേരില് ക്യാമ്പെയിന് ആരംഭിച്ചു.
ആരോഗ്യ വകുപ്പ് മന്ത്രി വീണാ ജോര്ജ് ക്യാമ്പെയിന്റെ ഉദ്ഘാടനവും പോസ്റ്റര് പ്രകാശനവും നിര്വ്വഹിച്ചു. എലിപ്പനിക്കെതിരെ ബോധവത്ക്കരണത്തിനും ജാഗ്രതക്കും വേണ്ടിയാണ് ക്യാമ്പെയിന് ആരംഭിച്ചതെന്ന് മന്ത്രി വീണാ ജോര്ജ് പറഞ്ഞു.
Whatsapp Group 1 | Whatsapp Group 2 |Telegram Group
വീട്ടില് ചെടി വച്ചുപിടിപ്പിക്കുന്നവര് ഉള്പ്പെടെയുള്ള മണ്ണുമായും, മലിനജലവുമായും സമ്പര്ക്കമുള്ള എല്ലാവരും എലിപ്പനി പ്രതിരോധ ഗുളികയായ ഡോക്സിസൈക്ലിന് കഴിക്കണം. ഡോക്സിസൈക്ലിന് എല്ലാ സര്ക്കാര് ആശുപത്രികളിലും സൗജന്യമായി ലഭിക്കുന്നതാണ്.
പകര്ച്ചവ്യാധികള്ക്കെതിരെ തദ്ദേശ സ്വയംഭരണ വകുപ്പുമായി ചേര്ന്ന് ആരോഗ്യ വകുപ്പ് ശുചീകരണ യജ്ഞം നടത്തി വരികയാണ്. വീടുകളില് എല്ലാ ഞായറാഴ്ചകളിലും ഡ്രൈ ഡേ ആചരിക്കണം. സ്കൂളുകളില് വെള്ളിയാഴ്ചകളിലും, സ്ഥാപനങ്ങളില് ശനിയാഴ്ചകളിലും ഡ്രൈ ഡേ ആചരിക്കണം.
വീടും, സ്ഥാപനവും, പരിസരവും ശുചിയാക്കണം. കൊതുകുജന്യ, ജന്തുജന്യ, ജലജന്യ രോഗങ്ങള്ക്കെതിരെ ജാഗ്രത പാലിക്കണം. എന്തെങ്കിലും രോഗ ലക്ഷണങ്ങള് കാണുന്നെങ്കില് ചികിത്സ തേടേണ്ടതാണെന്നും മന്ത്രി വ്യക്തമാക്കി. ആരോഗ്യ വകുപ്പ് ഡെപ്യൂട്ടി ഡയറക്ടര് ഡോ. വിദ്യ, അസി. ഡയറക്ടര് ഡോ. അനില്, സ്റ്റേറ്റ് മാസ് മീഡിയ ടീം എന്നിവര് പരിപാടിയില് പങ്കെടുത്തു.
