തിരുവനന്തപുരം: വഖഫ് ബോർഡ് പുനഃസംഘടന ചോദ്യം ചെയ്ത് പിരിച്ചുവിട്ട ബോർഡ് ചെയർമാൻ കെ.എസ്. ഹംസ ഹൈക്കോടതിയില്‍.
നടപടിക്രമങ്ങള്‍ പാലിക്കാതെയാണ് ബോർഡ് പുനഃസംഘടിപ്പിച്ചതെന്ന് കെ.എസ്. ഹംസ ആരോപിച്ചു.
വഖഫ് ബോർഡ് പിരിച്ചുവിടാൻ ഉമീദ് നിയമത്തില്‍ വ്യവസ്ഥയില്ലെന്നാണ് കെ.എസ്. ഹംസയുടെ വാദം. വഖഫ് നിയമത്തിലെ 14-ാം വകുപ്പ് പാലിച്ചല്ല പുനഃസംഘടന നടത്തിയതെന്നും അദ്ദേഹം ചൂണ്ടിക്കാട്ടി.
വഖഫ് ബോർഡ് പുനഃസംഘടിപ്പിക്കണമെന്ന് ഡിവിഷൻ ബെഞ്ച് ഉത്തരവിട്ടിട്ടില്ലെന്നും കെ.എസ്. ഹംസ വ്യക്തമാക്കി. ബോർഡിലെ ഒഴിവ് നികത്താൻ നടപടി സ്വീകരിക്കണമെന്നാണ് ഡിവിഷൻ ബെഞ്ചിന്റെ നിർദേശം.
ഈ നിർദേശം മറികടന്നാണ് സർക്കാർ നടപടിയെടുത്തതെന്നും അദ്ദേഹം ആരോപിച്ചു.
ബോറ വിഭാഗത്തില്‍ നിന്നുള്ള അംഗത്തെ ഉള്‍പ്പെടുത്താനാണ് ബോർഡ് പുനഃസംഘടിപ്പിച്ചതെന്ന സർക്കാർ വാദവും തെറ്റാണെന്ന് കെ.എസ്. ഹംസ പറഞ്ഞു.
ബോർഡില്‍ ഒരു എംഎല്‍എയുടെ ഒഴിവ് നിലവിലുണ്ട്. ഈ ഒഴിവില്‍ ബോറ വിഭാഗത്തില്‍നിന്നുള്ള അംഗത്തെ നിയമിക്കാമായിരുന്നുവെന്നും അദ്ദേഹം ചൂണ്ടിക്കാട്ടി.
