തിരുവനന്തപുരം: സർക്കാർ ജീവനക്കാർക്കും പെൻഷൻകാർക്കും ആശ്വാസമായി സർക്കാർ ഉത്തരവ്.
ജീവനക്കാർക്കും പെൻഷൻകാർക്കും രണ്ടുശതമാനം ഡി.എ/ ഡി.ആർ അനുവദിച്ചു. നവംബർ ഒന്നിന് വിതരണം ചെയ്യുന്ന ശമ്പളത്തോടും പെൻഷനുമൊപ്പം ഇത് ലഭിക്കുമെന്ന് സർക്കാർ അറിയിച്ചു.
രണ്ടു ശതമാനം ഡി.എ/ ഡി.ആർ അനുവദിച്ചത് ജീവനക്കാർക്കും താത്കാലിക ആശ്വാസമാകും. പുതിയ സർക്കാർ അധികാരമേറ്റ ശേഷം ശമ്പള പരിഷ്കരണം ഉള്‍പ്പെടെയുള്ള വിഷയങ്ങളില്‍ തീരുമാനങ്ങളെടുക്കാത്തതില്‍ ജീവനക്കാരില്‍ അതൃപ്തി പുകയുന്നുണ്ട്.
പഴയ ഡി.എ/ഡി.ആർ കുടിശികയും നല്‍കിയിട്ടില്ല. ഈ പശ്ചാത്തലത്തിലാണ് രണ്ടു ശതമാനം ഡി.എ/ഡി.ആർ അനുവദിച്ചത്.
ഇതുമായി ബന്ധപ്പെട്ട് സർക്കാരിന് മാസംതോറും 96 കോടിയാണ് അധിക ബാദ്ധ്യതയായി വരിക. ഇതോടെ ഡി.എ 7 ശതമാനമാകും.
