ജയ്പൂർ: എട്ടാം ക്ലാസില്‍ പഠനം നിർത്തിയ യുവാവ് വ്യാജ ബിരുദ സർട്ടിഫിക്കറ്റുകളുണ്ടാക്കി രാജസ്ഥാൻ മെഡിക്കല്‍ കൗണ്‍സിലില്‍ രജിസ്റ്റർ ചെയ്യുകയും സ്വന്തമായി നൂറ് കിടക്കകളുള്ള വമ്പൻ ആശുപത്രി സ്ഥാപിച്ച്‌ ശസ്ത്രക്രിയകള്‍ നടത്തിയ ആളെ രാജസ്ഥാൻ പോലീസ് സ്പെഷ്യല്‍ ഓപ്പറേഷൻസ് ഗ്രൂപ്പ് പിടികൂടി.
മുഖ്യപ്രതിയായ നാൻജിറാം ചൗധരി, കസാക്കിസ്ഥാനില്‍ മെഡിസിൻ പഠിച്ചെങ്കിലും യോഗ്യതാ പരീക്ഷ ജയിക്കാത്തതിനെത്തുടർന്ന് വ്യാജ സർട്ടിഫിക്കറ്റ് ചമച്ച പങ്കജ് യാദവ് (30) എന്നിവരെയാണ് എസ്‌ഒജി സംഘം അറസ്റ്റ് ചെയ്തത്. 2010-ല്‍ ഒരു സ്വകാര്യ ക്ലിനിക്കില്‍ രോഗികള്‍ക്ക് ഒപി ടിക്കറ്റ് വിതരണം ചെയ്യുന്ന ചെറിയ ജീവനക്കാരനായി ജീവിതം തുടങ്ങിയ നാൻജിറാം ചൗധരി, പിന്നീട് ജാലോർ ജില്ലയിലെ റാണിവാഡയിലുള്ള രാജ്‌ദേവ് ആശുപത്രിയില്‍ ജീവനക്കാരനായി ചേരുകയായിരുന്നു.
തുടർന്ന് 2015-ല്‍ ഈ ആശുപത്രി സ്വന്തമാക്കിയ ഇയാള്‍, 2016-ല്‍ ഇതിനെ 'ഭാസ്കർ ഹോസ്പിറ്റല്‍' എന്ന് പുനർനാമകരണം ചെയ്യുകയും നൂറ് കിടക്കകളുള്ള അത്യാധുനിക മള്‍ട്ടി സ്പെഷ്യാലിറ്റി ആശുപത്രിയായി വികസിപ്പിക്കുകയുമായിരുന്നു. ആശുപത്രിയില്‍ ജോലിക്ക് യഥാർത്ഥ ഡോക്ടർമാരെ നിയമിച്ചിരുന്നെങ്കിലും ഗൈനക്കോളജി സർജറികള്‍ അടക്കമുള്ള നിർണായക ശസ്ത്രക്രിയകള്‍ ചൗധരി സ്വന്തമായാണ് നടത്തിയിരുന്നത്.
രാജസ്ഥാൻ മെഡിക്കല്‍ കൗണ്‍സില്‍ ഓഫീസുമായി സ്ഥിരമായി ബന്ധം പുലർത്തിയിരുന്ന ഇയാള്‍ ഉദ്യോഗസ്ഥരെ സ്വാധീനിച്ചാണ് വ്യാജ ഡോക്ടർ രജിസ്ട്രേഷൻ നേടിയെടുത്തത്.
പത്താം ക്ലാസ്, പന്ത്രണ്ടാം ക്ലാസ് വ്യാജ മാർക്ക് ലിസ്റ്റുകള്‍ക്ക് പുറമെ കാണ്‍പൂരിലെ രാമ സർവകലാശാലയില്‍ നിന്നുള്ള വ്യാജ എംബിബിഎസ് ബിരുദവും, മുംബൈയിലെ പ്രശസ്തമായ കോളേജ് ഓഫ് ഫിസിഷ്യൻസ് ആൻഡ് സർജൻസില്‍ നിന്നുള്ള ഗൈനക്കോളജി ഡിപ്ലോമയും (DGO) സമർപ്പിച്ചാണ് ഇയാള്‍ വ്യാജ ഡോക്ടറായത്. മുംബൈയിലെ മെഡിക്കല്‍ കോളേജ് അധികൃതർ ഈ സർട്ടിഫിക്കറ്റുകള്‍ വ്യാജമാണെന്ന് സ്ഥിരീകരിച്ചിട്ടുണ്ട്. രണ്ടാമത്തെ പ്രതിയായ പങ്കജ് യാദവ് കസാക്കിസ്ഥാനില്‍ നിന്ന് മെഡിസിൻ പഠനം പൂർത്തിയാക്കിയെങ്കിലും ഇന്ത്യയില്‍ പ്രാക്ടീസ് ചെയ്യുന്നതിന് വിദേശ മെഡിക്കല്‍ ബിരുദധാരികള്‍ എഴുതേണ്ട എഫ്‌എംജിഇ പരീക്ഷയില്‍ ആറ് തവണ തുടർച്ചയായി പരാജയപ്പെടുകയായിരുന്നു.
തുടർന്ന് ബിഹാറിലെ മെഡിക്കല്‍ കോളേജിന്റെ പേരില്‍ വ്യാജ എംബിബിഎസ് സർട്ടിഫിക്കറ്റും ബിഹാർ മെഡിക്കല്‍ കൗണ്‍സിലിന്റെ വ്യാജ രജിസ്ട്രേഷനും ചമച്ചാണ് ഇയാള്‍ പ്രാക്ടീസ് ചെയ്തിരുന്നത്. ഹരിയാനയിലെ കൈത്തലില്‍ ഒളിവില്‍ കഴിയവെയാണ് ഇയാള്‍ പിടിയിലായത്. മെഡിക്കല്‍ കൗണ്‍സില്‍ രജിസ്ട്രാർ നല്‍കിയ പരാതിയിലാണ് എസ്‌ഒജി എഡിജി വിശാല്‍ ബൻസാല്‍, ഐജി അജയ് പാല്‍ ലാംബ എന്നിവരുടെ നേതൃത്വത്തിലുള്ള സംഘം അന്വേഷണം നടത്തി തട്ടിപ്പ് പുറത്തുകൊണ്ടുവന്നത്. പ്രതികള്‍ക്ക് ഇത്തരം വ്യാജ മെഡിക്കല്‍ സർട്ടിഫിക്കറ്റുകള്‍ നിർമ്മിച്ച്‌ നല്‍കിയ അന്തർസംസ്ഥാന വ്യാജ ഡിഗ്രി മാഫിയയെ കണ്ടെത്താൻ അന്വേഷണം ഊർജ്ജിതമാക്കിയിട്ടുണ്ട്.
