• വോട്ടർപട്ടികയിൽ പേര് ചേർക്കാനും തിരുത്താനും ഒക്ടോബർ 15 മുതൽ അവസരം; വില്ലേജ് ഓഫീസുകളിൽ ഹെൽപ്പ് ഡെസ്കുകൾ ഒരുങ്ങുന്നു!

തിരുവനന്തപുരം: നിലവിലുള്ള വോട്ടർപട്ടികയിൽ പുതിയതായി പേര് ചേർക്കുന്നതിനും പട്ടികയിലുള്ള പേരിൽ ആവശ്യമായ തിരുത്തലുകൾ വരുത്തുന്നതിനുമായി പ്രത്യേക എൻറോൾമെന്റ് ഡ്രൈവുമായി തെരഞ്ഞെടുപ്പ് കമ്മീഷൻ രംഗത്തെത്തി. ഒക്ടോബർ 15 മുതൽ 31 വരെ സംസ്ഥാന വ്യാപകമായി ഈ പ്രത്യേക വോട്ടർപട്ടിക പുതുക്കൽ യജ്ഞം നടത്തുമെന്ന് മുഖ്യ തെരഞ്ഞെടുപ്പ് ഓഫീസർ ഡോക്ടർ സജിത് ബാബു അറിയിച്ചു. ഒക്ടോബർ അഞ്ചിന് കൂടിയ ഓൺലൈൻ യോഗത്തിലാണ് ജില്ലാ കളക്ടർമാർക്ക് അദ്ദേഹം ഇതുസംബന്ധിച്ച കർശന നിർദ്ദേശം നൽകിയത്. വില്ലേജ് ഓഫീസുകൾ കേന്ദ്രീകരിച്ചായിരിക്കും ഇതിനായുള്ള പ്രത്യേക ഹെൽപ്പ് ഡെസ്കുകൾ പ്രവർത്തിക്കുക. പുതിയ നിർദ്ദേശപ്രകാരം അധിക ഡിക്ലറേഷൻ ഫോം പൂർണ്ണമായി ഒഴിവാക്കി അപേക്ഷകർ ഫോം ആറ് മാത്രം ഓൺലൈനായി സമർപ്പിച്ചാൽ മതിയാകും. പൗരന്മാർക്ക് സിറ്റിസൺ സർവീസ് പോർട്ടൽ വഴിയോ വോട്ടർ ഹെൽപ്പ്‌ലൈൻ ആപ്പ് വഴിയോ ഓൺലൈനായി അപേക്ഷകൾ നൽകാം. ഇതിനായി ഫോട്ടോ, വയസ്സ്, മേൽവിലാസം എന്നിവ തെളിയിക്കുന്നതിന് തെരഞ്ഞെടുപ്പ് കമ്മീഷൻ അംഗീകരിച്ച പന്ത്രണ്ട് ഔദ്യോഗിക രേഖകളിൽ ഏതെങ്കിലും ഒന്ന് ഹാജരാക്കേണ്ടതുണ്ട്. തിരിച്ചറിയലിനായി ആധാർ കാർഡ് നൽകുന്നവർ മറ്റൊരു തിരിച്ചറിയൽ രേഖ കൂടി നിർബന്ധമായും സമർപ്പിക്കണമെന്ന് തെരഞ്ഞെടുപ്പ് കമ്മീഷൻ വ്യക്തമാക്കിയിട്ടുണ്ട്. വോട്ടർമാർ നേരിട്ടെത്തി വേണം അപേക്ഷാ നടപടികൾ പൂർത്തിയാക്കാൻ. ഇതിന് മുന്നോടിയായി രണ്ടായിരത്തി ഇരുപത്തിയഞ്ച് ജനുവരി ഒന്നിന് നിലവിൽ വന്ന വോട്ടർപട്ടികയും നിയമസഭാ തെരഞ്ഞെടുപ്പിന് തൊട്ടുമുമ്പ് നിലവിലുണ്ടായിരുന്ന വോട്ടർപട്ടികയും തമ്മിലുള്ള പ്രധാന വ്യത്യാസങ്ങൾ പരിശോധിക്കാൻ ഇലക്ടറൽ രജിസ്ട്രേഷൻ ഓഫീസർമാർക്ക് കമ്മീഷണർ നിർദ്ദേശം നൽകിയിട്ടുണ്ട്. കൂടാതെ പ്രത്യേക സംഗ്രഹണ പുതുക്കൽ സമയത്ത് തിരികെ ലഭിക്കാത്ത അപേക്ഷകളിൽ എത്രയെണ്ണം തെരഞ്ഞെടുപ്പിന് ശേഷം പ്രസിദ്ധീകരിച്ച പട്ടികയിൽ ഉൾപ്പെടാതെയുണ്ട് എന്നതിനെക്കുറിച്ച് ഇലക്ടറൽ രജിസ്ട്രേഷൻ ഓഫീസർ തലത്തിൽ വിശദമായ പരിശോധന നടത്തും. യുവവോട്ടർമാർക്കിടയിൽ വോട്ടർ അവബോധം നടത്തുന്നതിന്റെ ഭാഗമായി കോളേജ്, ഹയർ സെക്കൻഡറി സ്കൂൾ തലത്തിൽ ക്യാമ്പസ് ടു യൂത്ത് എന്ന പേരിൽ എൻറോൾമെന്റ് ഡ്രൈവ് നടത്താനും കമ്മീഷൻ തീരുമാനിച്ചിട്ടുണ്ട്. സ്റ്റെപ്പ് ഫോർവേഡ് ഗെറ്റ് കൗണ്ടഡ് എന്ന ടാഗ് ലൈനോടെ നവംബർ രണ്ടിന് ക്യാമ്പസ് ഹയർ സെക്കൻഡറി സ്കൂൾ തലത്തിൽ ഒരാഴ്ച നീണ്ടുനിൽക്കുന്ന എൻറോൾമെന്റ് ഡ്രൈവ് നടത്തുകയാണ് ഇതിലൂടെ ലക്ഷ്യമിടുന്നത്. ഇലക്ട്രോറൽ ലിറ്ററസി ക്ലബ്ബുകൾ വഴി പരമാവധി വിദ്യാർത്ഥികളെ തെരഞ്ഞെടുപ്പ് അവബോധ പ്രവർത്തനങ്ങളിൽ പങ്കാളികളാക്കാനുള്ള നടപടികൾ ബന്ധപ്പെട്ട ജില്ലാ കളക്ടർമാർ സ്വീകരിക്കും.