ചെന്നൈ: തമിഴക വെട്രി കഴകം (ടിവികെ) അധ്യക്ഷൻ വിജയ്‌യുടെ തിരഞ്ഞെടുപ്പ് വിജയം റദ്ദാക്കണമെന്ന് ആവശ്യപ്പെട്ട് സമർപ്പിച്ച ഹർജിയില്‍ മദ്രാസ് ഹൈക്കോടതി ജസ്റ്റിസ് വി. ലക്ഷ്മിനാരായണന്‍റെ ബെഞ്ച് ബുധനാഴ്ച വിധി പ്രസ്താവിക്കും.
വിജയ് തിരഞ്ഞെടുപ്പ് സത്യവാങ്മൂലത്തില്‍ സ്വത്ത് വിവരങ്ങള്‍ മറച്ചുവെച്ചു എന്ന് ആരോപിച്ചാണ് എസ് ദിനേശ് എന്നയാള്‍ ഹർജി നല്‍കിയിരിക്കുന്നത്.
ഏകദേശം 30 കോടി രൂപ മൂല്യമുള്ള വസ്തുവിന്‍റെ വിവരങ്ങള്‍ വിജയ് തിരഞ്ഞെടുപ്പ് സത്യവാങ്മൂലത്തില്‍ ഉള്‍പ്പെടുത്തിയിട്ടില്ലെന്നും, അതിനാല്‍ ജനപ്രാതിനിധ്യ നിയമപ്രകാരം അദ്ദേഹത്തിന്‍റെ വിജയം അസാധുവാക്കണമെന്നുമാണ് ഹർജിക്കാരൻ ആവശ്യപ്പെട്ടത്.
കേസില്‍ വിധി പറയുന്നതിന് മുൻപുള്ള വാദമുഖങ്ങള്‍ കേള്‍ക്കവേ, ഹൈക്കോടതി ഹർജിക്കാരനോട് നിരവധി സുപ്രധാന ചോദ്യങ്ങള്‍ ഉന്നയിച്ചിട്ടുണ്ട്.
ഏകദേശം 600 കോടി രൂപയുടെ ആസ്തി വെളിപ്പെടുത്തിയ ഒരാള്‍, 30 കോടി രൂപയുടെ വിവരങ്ങള്‍ വിട്ടുപോയെന്ന കാരണം കൊണ്ട് അദ്ദേഹത്തിന് വോട്ട് ചെയ്യാൻ തീരുമാനിച്ച ഒരു വോട്ടറുടെ മനസ്സ് മാറുമോ? എന്ന് കോടതി ചോദിച്ചു.
600 കോടിയുടെ ആസ്തിയില്‍ 30 കോടിയുടെ വിവരങ്ങള്‍ പൂർണ്ണമായി വെളിപ്പെടുത്താത്തത് അഴിമതിയായി കണക്കാക്കാൻ സാധിക്കുമോയെന്നും കോടതി ചോദിച്ചു.
