കണ്ണൂർ: നിലവിലെ യുഡിഎഫ് സർക്കാർ പൂർണ്ണമായും അദാനി സ്പോൺസേർഡ് സർക്കാരാണെന്ന് വ്യക്തമായതായി രേഖകൾ നിരത്തി സി.പി.ഐ.എം നേതാവ് എം.വി. ജയരാജൻ ആരോപിച്ചു. വിഴിഞ്ഞം അന്താരാഷ്ട്ര തുറമുഖത്തിന്റെ ഓഹരി കൈമാറ്റവുമായി ബന്ധപ്പെട്ട് വിവരാവകാശ നിയമപ്രകാരം ലഭിച്ച രേഖകളും നിയമസഭയിൽ സർക്കാർ നൽകിയ ഔദ്യോഗിക മറുപടിയും പരസ്പരവിരുദ്ധവും അദാനി ഗ്രൂപ്പിനെ സംരക്ഷിക്കുന്നതുമാണെന്ന് അദ്ദേഹം വാർത്താസമ്മേളനത്തിൽ തുറന്നടിച്ചു. യഥാർത്ഥ കരാർ വ്യവസ്ഥകൾ പ്രകാരം സംസ്ഥാന സർക്കാരിന്റെ മുൻകൂർ അനുമതിയില്ലാതെ അദാനിക്ക് തുറമുഖത്തിന്റെ ഓഹരികൾ വിൽക്കാൻ കഴിയില്ലെന്നിരിക്കെ, അന്താരാഷ്ട്ര ഷിപ്പിംഗ് കമ്പനിയായ എം.എസ്.സി.യുടെ ഉപകമ്പനിയായ മുണ്ടി പ്രൈവറ്റ് ലിമിറ്റഡ് എന്ന സ്ഥാപനത്തിന് വിഴിഞ്ഞം തുറമുഖത്തിന്റെ അദാനിയുടെ 49 ശതമാനം ഓഹരികൾ ഇതിനോടകം കൈമാറി നൽകിയിരിക്കുകയാണെന്ന് ജയരാജൻ വെളിപ്പെടുത്തി. ഈ വിഷയം പ്രതിപക്ഷ നേതാവ് സഭയിൽ ഉന്നയിച്ചപ്പോൾ പത്രവാർത്തകളിലൂടെ മാത്രമാണ് താൻ വിവരം അറിഞ്ഞതെന്നാണ് മുഖ്യമന്ത്രി വി.ഡി. സതീശൻ നിയമസഭയെ അറിയിച്ചതെന്നും, എന്നാൽ ഈ ഓഹരി കൈമാറ്റം തടയാൻ സർക്കാർ നാളിതുവരെ ഒരു നിയമനടപടിയും സ്വീകരിക്കാത്തത് അദാനിയെ സഹായിക്കാനുള്ള വ്യക്തമായ കള്ളക്കളിയുടെ ഭാഗമാണെന്നും അദ്ദേഹം ആരോപിച്ചു.
തുറമുഖ ഇടപാടുകൾക്ക് പുറമെ, സംസ്ഥാനത്ത് വരാനിരിക്കുന്ന വലിയ വൈദ്യുതി നിരക്ക് വർദ്ധനവിന് പിന്നിലും അദാനിയുടെ താല്പര്യങ്ങൾ സംരക്ഷിക്കാനുള്ള നീക്കമാണെന്ന് ജയരാജൻ കുറ്റപ്പെടുത്തി. പവർകട്ട് ഒഴിവാക്കിയെന്ന് സർക്കാർ അവകാശപ്പെടുന്നുണ്ടെങ്കിലും, അദാനി പവർ കോർപ്പറേഷനിൽ നിന്ന് ഒരു യൂണിറ്റിന് 11 രൂപ നിരക്കിലും ഹിമാചലിൽ നിന്ന് 14.60 രൂപ എന്ന വൻ തുകയ്ക്കും വൈദ്യുതി വാങ്ങാനാണ് സർക്കാർ കരാറിലേർപ്പെട്ടിരിക്കുന്നത്. വിപണി നിരക്കിലും ഇരട്ടിയിലധികം തുക നൽകി സ്വകാര്യ കമ്പനികളിൽ നിന്ന് വൈദ്യുതി വാങ്ങുന്നതിലൂടെയുള്ള വൻ സാമ്പത്തിക ബാധ്യത സാധാരണക്കാരായ ജനങ്ങളുടെ മേൽ അടിച്ചേൽപ്പിക്കാനാണ് നീക്കം നടക്കുന്നത്. വരും ദിവസങ്ങളിൽ ഇടിത്തീ പോലെ പാവപ്പെട്ട ഉപഭോക്താക്കളുടെ മേൽ വരാൻ പോകുന്നത് ഷോക്കടിപ്പിക്കുന്ന കനത്ത കറന്റ് ബില്ലുകളായിരിക്കുമെന്നും, അദാനിയുമായുള്ള സർക്കാരിന്റെ ഈ അവിശുദ്ധ കൂട്ടുകെട്ടിനെതിരെ ശക്തമായ ജനകീയ പ്രതിരോധം ഉയരണമെന്നും എം.വി. ജയരാജൻ കൂട്ടിച്ചേർത്തു.
