തിരുവനന്തപുരം: വിതുര പേപ്പാറയിലെ അക്കേഷ്യ പ്ലാന്റേഷനിൽ ജോലി ചെയ്യുന്നതിനിടെ പാമ്പുകടിയേറ്റ അതിഥി തൊഴിലാളിക്ക് 108 ആംബുലൻസ് അനുവദിക്കാത്തതായി പരാതി. ഒഡിഷ സ്വദേശിയായ ബാലഭദ്രനാണ് സംഭവത്തിൽ ദുരിതമനുഭവിച്ചത്.
ഇന്ന് രാവിലെ 7.15ഓടെയാണ് അക്കേഷ്യ പ്ലാന്റേഷനിൽ ജോലി ചെയ്യുന്നതിനിടെ ബാലഭദ്രന് പാമ്പുകടിയേറ്റത്. തുടർന്ന് അദ്ദേഹത്തെ വിതുര താലൂക്ക് ആശുപത്രിയിൽ പ്രവേശിപ്പിച്ചു. പ്രാഥമിക ചികിത്സയ്ക്ക് ശേഷം കൂടുതൽ വിദഗ്ധ ചികിത്സയ്ക്കായി തിരുവനന്തപുരം മെഡിക്കൽ കോളേജ് ആശുപത്രിയിലേക്ക് മാറ്റാൻ ഡോക്ടർമാർ നിർദേശിച്ചു.
എന്നാൽ, ആശുപത്രിയിൽ നിന്ന് 108 ആംബുലൻസ് ലഭിച്ചില്ലെന്നാണ് പരാതി. ഇതോടെ സ്വകാര്യ ആംബുലൻസ് ഏർപ്പെടുത്തിയാണ് ബാലഭദ്രനെ തിരുവനന്തപുരം മെഡിക്കൽ കോളേജ് ആശുപത്രിയിലേക്ക് കൊണ്ടുപോയത്. സംഭവത്തിൽ ആരോഗ്യവകുപ്പിന്റെയും ബന്ധപ്പെട്ട അധികൃതരുടെയും ഭാഗത്തുനിന്നുള്ള വിശദീകരണം ലഭ്യമായിട്ടില്ല.
