കൊച്ചി: വെള്ളാപ്പള്ളി നടേശന് ഉള്പ്പെടെയുള്ളവര് പ്രതികളായ മൈക്രോ ഫിനാന്സ് കേസില് പ്രോസിക്യൂഷന് അനുമതി ആവശ്യമില്ലെന്ന് സംസ്ഥാന സര്ക്കാര് ഹൈക്കോടതിയില്.
പ്രതികള് സ്വകാര്യ സ്ഥാപനങ്ങളുമായി ബന്ധപ്പെട്ടവരായതിനാല് ഔദ്യോഗിക പദവിയിലുള്ളവര്ക്ക് ബാധകമായ പ്രോസിക്യൂഷന് അനുമതി ഇവര്ക്ക് ആവശ്യമില്ലെന്നാണ് സര്ക്കാരിന്റെ നിലപാട്.
അതേസമയം, കേസില് പ്രോസിക്യൂഷന് അനുമതി ആവശ്യമാണ് എന്ന നിലപാടാണ് വിജിലന്സ് നേരത്തെ സ്വീകരിച്ചിരുന്നത്. സര്ക്കാര്-വിജിലന്സ് നിലപാടുകളിലെ വ്യത്യാസത്തില് ഹൈക്കോടതി നേരത്തെ രൂക്ഷവിമര്ശനം ഉന്നയിച്ചിരുന്നു. ഹര്ജിയിലെ ഇടക്കാല ഉത്തരവ് പറയുന്നത് കോടതി മാറ്റിവച്ചു.
വെള്ളാപ്പള്ളി നടേശന്, എസ്.എന്.ഡി.പി യോഗം പ്രസിഡന്റ് എം.എന്. സോമന് ഉള്പ്പെടെയുള്ളവരാണ് കേസിലെ പ്രതിപ്പട്ടികയിലുള്ളത്. കേസുമായി ബന്ധപ്പെട്ട് ഇതുവരെ എട്ട് കുറ്റപത്രങ്ങളാണ് വിജിലന്സ് തയ്യാറാക്കിയിട്ടുള്ളത്.
പിന്നാക്ക വിഭാഗത്തില്പ്പെട്ട സ്ത്രീകള്ക്ക് ചെറുകിട സംരംഭങ്ങള് ആരംഭിക്കുന്നതിനായി നബാര്ഡ് മുഖേന പിന്നാക്ക വികസന കോര്പ്പറേഷന് അനുവദിച്ച ധനസഹായത്തില് ക്രമക്കേട് നടത്തിയെന്നാണ് കേസ്. അമിത പലിശ ഈടാക്കുകയും പദ്ധതിയുടെ മറവില് സാമ്പത്തിക ക്രമക്കേട് നടത്തുകയും ചെയ്തുവെന്നാണ് വിജിലന്സ് കേസ്.
സ്ത്രീകളുടെ പേരില് വ്യാജ പദ്ധതികള് തയ്യാറാക്കി പിന്നാക്ക വികസന കോര്പ്പറേഷനില് നിന്ന് കോടിക്കണക്കിന് രൂപ വായ്പയായി നേടിയെന്നാണ് പ്രധാന ആരോപണം. സാമ്പത്തിക തിരിമറിയും ഗൂഢാലോചനയും ഉള്പ്പെടെയുള്ള ക്രമക്കേടുകളിലൂടെ ഏകദേശം 15 കോടി രൂപയുടെ തട്ടിപ്പ് നടന്നുവെന്നായിരുന്നു മുന് മുഖ്യമന്ത്രി വി.എസ്. അച്യുതാനന്ദന്റെ ആരോപണം.
2016ലാണ് വി.എസ്. അച്യുതാനന്ദന്റെ പരാതിയുടെ അടിസ്ഥാനത്തില് വെള്ളാപ്പള്ളി നടേശനെതിരെ വിജിലന്സ് അന്വേഷണം ആരംഭിച്ചത്. കേസിന്റെ ഭാഗമായി കഴിഞ്ഞ ഫെബ്രുവരിയില് വിജിലന്സ് സംഘം വെള്ളാപ്പള്ളി നടേശന്റെ വീട്ടിലെത്തി ചോദ്യം ചെയ്തിരുന്നു.
കേസിലെ പ്രോസിക്യൂഷന് അനുമതിയുമായി ബന്ധപ്പെട്ട തര്ക്കമാണ് ഇപ്പോള് ഹൈക്കോടതിയുടെ പരിഗണനയിലുള്ളത്. പ്രതികള് സ്വകാര്യ സ്ഥാപനങ്ങളുടെ ഭാരവാഹികളായതിനാല് അനുമതി ആവശ്യമില്ലെന്ന സര്ക്കാര് നിലപാടും അനുമതി വേണമെന്ന വിജിലന്സ് നിലപാടും തമ്മിലുള്ള വ്യത്യാസത്തിലാണ് കോടതിയുടെ ഇടക്കാല ഉത്തരവ് നിര്ണായകമാകുന്നത്.
