തിരുവനന്തപുരം: സംസ്ഥാനത്തെ സ്വയംഭരണ (ഓട്ടോണമസ്) കോളേജുകള്‍ക്ക് പുതിയ കോഴ്‌സുകള്‍ ആരംഭിക്കുന്നതിനും സീറ്റുകള്‍ വർധിപ്പിക്കുന്നതിനുമായി ഏർപ്പെടുത്തിയിരുന്ന കർശന മാനദണ്ഡങ്ങളില്‍ ഇളവുകള്‍ അനുവദിച്ചത് 56 ദിവസത്തിനുള്ളില്‍.
പുതിയ കോഴ്‌സുകള്‍ ആരംഭിക്കുന്നതിന് മുൻകൂറായി സർക്കാരിന്റെ എൻ ഒ സി നിർബന്ധമാക്കിക്കൊണ്ട് സെപ്റ്റംബർ 11-നാണ് ഉന്നത വിദ്യാഭ്യാസ വകുപ്പ് സർക്കുലർ ഇറക്കിയിരുന്നത്. എന്നാല്‍ 56 ദിവസത്തിന് ശേഷം, നവംബർ 6-ലെ പുതിയ സർക്കുലറിലൂടെ ഇതില്‍ ഇളവ് വരുത്തി സർക്കാർ മുൻ നിലപാട് തിരുത്തുകയായിരുന്നു.
പുതിയ ഉത്തരവ് പ്രകാരം സ്വയംഭരണ കോളേജുകള്‍ക്ക് ഇനി കോഴ്‌സുകള്‍ക്കായി മുൻകൂർ എൻ ഒസി ആവശ്യമില്ല. പ്രവേശന നടപടികള്‍ പൂർത്തിയാക്കിയ ശേഷമോ കോഴ്‌സ് ആരംഭിച്ച ശേഷമോ സർക്കാരിനെ വിവരം അറിയിച്ചാല്‍ മതിയാകും.
കൂടാതെ, ഓരോ വർഷവും എൻ ഒസി പുതുക്കണമെന്ന നിയമത്തില്‍ ഇളവ് നല്‍കി അത് മൂന്ന് വർഷത്തിലൊരിക്കലാക്കി മാറ്റിയിട്ടുമുണ്ട്. സർക്കാരിന്റെ പുതിയ ഉത്തരവിനെതിരെ കോണ്‍ഗ്രസ് വിദ്യാർത്ഥി യൂണിയൻ എതിർത്തിട്ടില്ല.
ഇളവുകള്‍ ഉന്നത വിദ്യാഭ്യാസ രംഗത്തെ സൗകര്യങ്ങള്‍ വർധിപ്പിക്കുന്നതിനും വിദ്യാർത്ഥികളുടെ പഠനാവസരങ്ങള്‍ വേഗത്തിലാക്കുന്നതിനും സഹായിക്കുമെന്ന സർക്കാരിന്റെ വിശദീകരണം തൃപ്തികരമാണെന്നാണ് കെ എസ് യു നിലപാട്.
