കോട്ടയം: എക്സൈസ് കമ്മീഷണർ ശ്രീറാം സാംബശിവ റാവുവിനെ സ്ഥാനത്തുനിന്ന് മാറ്റിയ നടപടിയില്‍ മുഖ്യമന്ത്രി വി.ഡി. സതീശനും സർക്കാരിനുമെതിരെ രൂക്ഷവിമർശനവുമായി സിപിഎം നേതാവും മുൻ സഹകരണ മന്ത്രിയുമായ വി.എൻ.
വാസവൻ. മുൻ സർക്കാരിന്റെ കാലത്ത് നല്‍കിയ ചുമതലകളെല്ലാം കൃത്യമായും സത്യസന്ധമായും നിയമവും ചട്ടവും പാലിച്ചുകൊണ്ട് നിർവേറ്റിയ വ്യക്തിയാണ് റാവുവെന്ന് വാസവൻ പറഞ്ഞു.
സർക്കാരിന്റെ ക്രമവിരുദ്ധവും ചട്ടവിരുദ്ധവുമായ നടപടികള്‍ക്ക് വഴങ്ങാത്തതാണ് അദ്ദേഹത്തിനെതിരെ നടപടിയെടുക്കാൻ കാരണമെന്നും വാസവൻ ആരോപിച്ചു. ബാർ ലൈസൻസ് വിഷയത്തില്‍ ഉമ്മൻചാണ്ടി സർക്കാർ സ്വീകരിച്ച അതേ നടപടികളാണ് മുൻ എല്‍ഡിഎഫ് സർക്കാരും പിന്തുടർന്നതെന്നും അദ്ദേഹം ചൂണ്ടിക്കാട്ടി.
സത്യസന്ധരായ ഉദ്യോഗസ്ഥരെ വേട്ടയാടുന്ന സമീപനമാണ് നിലവിലെ സർക്കാരിന്റേതെന്നും വാസവൻ വിമർശിച്ചു. നിലവിലെ ഭരണത്തില്‍ മറ്റുമന്ത്രിമാർക്ക് യാതൊരു റോളുമില്ലെന്നും മുഖ്യമന്ത്രിയുടെ ‘വണ്‍മാൻ ഷോ’ ആണ് സർക്കാരില്‍ നടക്കുന്നതെന്നും അദ്ദേഹം കൂട്ടിച്ചേർത്തു.
