ബംഗളൂരു: രാജ്യത്തെ രണ്ടാമത്തെ വന്ദേഭാരത് സ്ലീപ്പർ എക്സ്പ്രസ് ട്രെയിൻ നവംബർ ഒന്നിന് സർവീസ് ആരംഭിക്കുമെന്ന് കേന്ദ്ര റെയില്‍വേ സഹമന്ത്രി വി സോമണ്ണ.
ബെംഗളൂരു-മുംബൈ റൂട്ടിലാണ് ദക്ഷിണേന്ത്യയിലെ ആദ്യ വന്ദേഭാരത് സ്ലീപ്പർ സർവീസ് ആരംഭിക്കുന്നത്. ഇതോടെ നിലവില്‍ 24 മണിക്കൂർ സമയമെടുക്കുന്ന ബെംഗളൂരു-മുംബൈ യാത്രാസമയം 16 മണിക്കൂറായി കുറയും.
16 എസി കോച്ചുകളുമായാണ് ബെംഗളൂരു-മുംബൈ വന്ദേഭാരത് സ്ലീപ്പർ സർവീസ് നടത്തുക. ആകെ 823 ബെർത്തുകളുണ്ടാകും.
ബെംഗളൂരുവില്‍ നിന്ന് രാത്രി 7.50ന് പുറപ്പെടുന്ന ട്രെയിൻ പിറ്റേദിവസം രാവിലെ 11.55-ഓടെ മുംബൈയിലെത്തും. 16 മണിക്കൂറും അഞ്ചുമിനിറ്റുമാണ് ബെംഗളൂരു-മുംബൈ വന്ദേഭാരത് സ്ലീപ്പറിന്റെ യാത്രാസമയം.
മുംബൈയില്‍ നിന്ന് രാത്രി 8.10ന് പുറപ്പെടുന്ന വന്ദേഭാരത് സ്ലീപ്പർ പിറ്റേദിവസം രാവിലെ 11.55ന് ബെംഗളൂരുവിലെത്തും. 15 മണിക്കൂറും 45 മിനിറ്റുമാണ് മുംബൈ-ബെംഗളൂരു വന്ദേഭാരത് സ്ലീപ്പറിന്റെ യാത്രസമയം. ആഴ്ചയില്‍ ആറുദിവസമായിരിക്കും സർവീസ്.
