കൊച്ചി: വടക്കൻ പറവൂർ താലൂക്ക് ആശുപത്രിക്കെതിരായ ചികിത്സാ പിഴവ് പരാതിയില്‍ അബ്ദുല്‍ ജബ്ബാറിനെ രാത്രി തന്നെ റഫർ ചെയ്തിരുന്നുവെന്ന് ആശുപത്രി റിപ്പോർട്ട്.
ജൂലൈ 26ന് രാത്രി 11:45നും വെളുപ്പിന് 3:30നും അബ്ദുല്‍ ജബ്ബാർ ആശുപത്രിയിലെത്തി. രണ്ടാമത് എത്തിയപ്പോള്‍ കോട്ടയത്തേക്ക് റഫർ ചെയ്തിരുന്നു. അവിടേക്ക് പോകാനാകില്ലെന്നായിരുന്നു മറുപടി. സ്വന്തം റിസ്കില്‍ വീട്ടിലേക്ക് പോകുന്നതായി എഴുതി നല്‍കിയിരുന്നുവെന്ന് ആശുപത്രി അധികൃതർ പറഞ്ഞു. ആശുപത്രി സൂപ്രണ്ട് എറണാകുളം ഡിഎംഒയ്ക്ക് റിപ്പോർട്ട് കൈമാറി. റിപ്പോർട്ട് ഡിഎംഒ, ഡിഎച്ച്‌എസിന് കൈമാറി.
ചികിത്സ വൈകിയതിനാല്‍ പറവൂർ കുന്നുകര സ്വദേശി അബ്ദുല്‍ ജബ്ബാറിൻ്റെ കാല്‍ മുറിച്ചുമാറ്റേണ്ടി വന്നു എന്നായിരുന്നു പരാതി. ജൂലൈ 26ന് രാത്രി 11 മണിയോടെ ആണ് കടുത്ത കാല്‍ വേദനയെ തുടർന്ന് 56കാരനായ അബ്ദുല്‍ ജബ്ബാർ വടക്കൻ പറവൂർ താലൂക്ക് ആശുപത്രിയില്‍ എത്തിയത്. വേദന സംഹാരി നല്‍കി ജൂനിയർ ഡോക്ടർമാർ അബ്ദുല്‍ ജബ്ബാറിനെ തിരിച്ചയച്ചു. വേദന കൂടിയതോടെ വീണ്ടും ആശുപത്രിയില്‍ എത്തിയെങ്കിലും വീണ്ടും വേദന സംഹാരി നല്‍കി വിട്ടയച്ചു. പിറ്റേദിവസം സർജനെ കണ്ടപ്പോള്‍ കാലിലേക്കുള്ള രക്തയോട്ടം നിലച്ചുവെന്നായിരുന്നു ഡോക്ടർ പറഞ്ഞതെന്ന് അബ്ദുല്‍ ജബ്ബാർ പറഞ്ഞു. കാലിലേക്കുള്ള രക്തയോട്ടം പൂർവസ്ഥിതിയിലാക്കാൻ ശ്രമം നടത്തിയെങ്കിലും ചികിത്സ ഫലിച്ചില്ല. തുടർന്ന് വലത് കാല്‍ മുറിച്ചു മാറ്റുകയായിരുന്നു.
രാത്രി രണ്ടുതവണ ആശുപത്രിയില്‍ എത്തിയിട്ടും വേദന സഹിക്കുന്നില്ലെന്ന് കരഞ്ഞ് പറഞ്ഞിട്ടും പറവൂർ താലൂക്ക് ആശുപത്രിയില്‍ നിന്ന് വിദഗ്ധ ചികിത്സ കിട്ടിയില്ലെന്ന് അബ്ദുല്‍ ജബ്ബാർ ആരോപിച്ചിരുന്നു. സീനിയർ ഡോക്ടറെ വിളിക്കാനോ റഫർ ചെയ്യാനോ ശ്രമിച്ചില്ലെന്നും അദ്ദേഹം പറഞ്ഞു. കാല്‍ മുറിച്ചു മാറ്റിയ ശേഷം ചികിത്സ രേഖകള്‍ തേടി വടക്കൻ പറവൂർ ആശുപത്രിക്ക് വിവരാവകാശ അപേക്ഷ നല്‍കിയെങ്കിലും കിട്ടിയിട്ടില്ല. പിന്നീട് വീണ്ടും അപേക്ഷിച്ചപ്പോള്‍ ആശുപത്രി സൂപ്രണ്ട് ഇടപെട്ടെന്നും പരാതി ഒതുക്കിത്തീർക്കാൻ ശ്രമം നടത്തിയെന്നും അബ്ദുല്‍ ജബ്ബാർ ആരോപിച്ചു. ഹോട്ടല്‍ ബിസിനസുകാരനായ അബ്ദുല്‍ ജബ്ബാറിന് കാല്‍ നഷ്ടപ്പെട്ടതോടെ കച്ചവടം നടത്താൻ കഴിയാതെയായിരുന്നു.
