കാസർകോട്: വേദിയില്‍ വന്ദേമാതരം മുഴുവനായി ചൊല്ലിയതില്‍ അതൃപ്തി പ്രകടിപ്പിച്ച്‌ ആരോഗ്യ മന്ത്രി കെ മുരളീധരൻ.
കാസർകോട് മുള്ളേരിയ കുടുംബാരോഗ്യ കേന്ദ്രത്തിലെ ലാബ് ഉദ്ഘാടന ചടങ്ങിലാണ് സംഭവം.
പാടി പൂർത്തിയാക്കുന്നതിന് മുമ്പ് മന്ത്രി വേദിയില്‍ ഇരുന്നു. ജില്ലാ കളക്ടറും രാജ്മോഹൻ ഉണ്ണിത്താൻ എംപിയും കല്ലട്ര മാഹിൻ എംഎല്‍എയും മന്ത്രിക്കൊപ്പം ഇരുന്നു. കെ നീലകണ്ഠൻ എംഎല്‍എ, ഡിസിസി പ്രസിഡന്റ്‌ പി കെ ഫൈസല്‍ എന്നിവർ പാടി പൂർത്തിയാക്കുന്നത് വരെ വേദിയില്‍ നിന്നു.
വന്ദേമാതരത്തിൻ്റെ ആദ്യ രണ്ട് ഖണ്ഡികകള്‍ ചൊല്ലിയതിന് പിന്നാലെയാണ് മന്ത്രിയും മറ്റുള്ളവരും വേദിയില്‍ ഇരിക്കാൻ ശ്രമിച്ചത്. വന്ദേമാതരം തുടർന്നതോടെ മന്ത്രിയും മറ്റുള്ളവരും ഇരുന്നു. ഇതിനിടെ മന്ത്രി അടുത്തുണ്ടായിരുന്നവരോട് സംസാരിക്കുന്നത് പുറത്തുവന്ന ദൃശ്യങ്ങളില്‍ കാണാം. ഔദ്യോഗിക പരിപാടികളില്‍ വന്ദേമാതരം മുഴുവനായി ആലപിക്കണമെന്ന് കേന്ദ്രസർക്കാർ നിർദേശം നല്‍കിയിരുന്നെങ്കിലും ആദ്യ രണ്ട് ഖണ്ഡികകള്‍ ചൊല്ലിയാല്‍ മതിയെന്ന് കോണ്‍ഗ്രസ് നിലപാടെടുത്തിരുന്നു. സംസ്ഥാനത്ത് വന്ദേമാതരം മുഴുവനായി ആലപിക്കില്ലെന്നും സർക്കാർ പരിപാടികളില്‍ രണ്ട് ഖണ്ഡികകള്‍ മാത്രമേ ചൊല്ലൂ എന്നും മന്ത്രി കെ മുരളീധരൻ വ്യക്തമാക്കിയിരുന്നു.
