തിരുവനന്തപുരം: ഇന്ത്യൻ റെയിൽവേയിൽ ലോക്കോ പൈലറ്റുമാർ ഉൾപ്പെടെയുള്ള തസ്തികകളിലെ ഒഴിവുകൾ നികത്താത്തത് ജീവനക്കാരിൽ കടുത്ത ആശങ്ക സൃഷ്ടിക്കുന്നു. തിരുവനന്തപുരം ഡിവിഷനു കീഴിൽ മാത്രം നൂറിലധികം ഒഴിവുകൾ നിലവിലുണ്ടെന്നാണ് ജീവനക്കാരുടെ സംഘടനകൾ പറയുന്നത്. മതിയായ വിശ്രമമില്ലാതെ തുടർച്ചയായി ഡ്യൂട്ടി ചെയ്യേണ്ട സാഹചര്യമാണെന്നും അവർ ആരോപിക്കുന്നു.
2018-ന് ശേഷം ഒഴിവുകൾ കൃത്യമായി നികത്താത്തതാണ് പ്രതിസന്ധി രൂക്ഷമാക്കിയതെന്നാണ് ജീവനക്കാരുടെ വിലയിരുത്തൽ. അധികസമയം ജോലി ചെയ്യേണ്ടിവരുന്നതും ഉറക്കക്കുറവും ട്രെയിൻ സുരക്ഷയെ ബാധിക്കുമെന്ന ആശങ്കയും ഉയരുന്നുണ്ട്. സമീപകാല ട്രെയിൻ അപകടങ്ങളുടെ പശ്ചാത്തലത്തിലും ജോലിഭാരവും വിശ്രമക്കുറവും ചർച്ചയായിരിക്കുകയാണ്.
സീനിയോറിറ്റി അടിസ്ഥാനമാക്കിയുള്ള സ്ഥലംമാറ്റത്തിലും ക്രമക്കേടുണ്ടെന്ന പരാതിയും ജീവനക്കാർ ഉന്നയിക്കുന്നു. ഒഴിവുകൾ ഉടൻ നികത്തി ലോക്കോ പൈലറ്റുമാരുടെ ജോലിഭാരം കുറയ്ക്കണമെന്നാണ് സംഘടനകളുടെ ആവശ്യം. ആവശ്യങ്ങൾ അംഗീകരിക്കാത്ത പക്ഷം ശക്തമായ സമരപരിപാടികളിലേക്ക് കടക്കുമെന്നും സംഘടനകൾ മുന്നറിയിപ്പ് നൽകി.
