മലപ്പുറം: അരീക്കോട് കിഴിശ്ശേരിയില് ഓട്ടോറിക്ഷയ്ക്ക് ഫിറ്റ്നസ് സര്ട്ടിഫിക്കറ്റ് ലഭിക്കാത്തതില് മനംനൊന്ത് ഓട്ടോ ഡ്രൈവര് ഷൗക്കത്ത് ജീവനൊടുക്കിയ സംഭവത്തില് മോട്ടോര് വാഹനവകുപ്പിലെ ഉദ്യോഗസ്ഥരുടെ ഭാഗത്ത് പിഴവുകളൊന്നും സംഭവിച്ചിട്ടില്ലെന്ന് ഗതാഗത കമീഷണറുടെ അന്വേഷണ റിപ്പോര്ട്ട്.
വാഹനത്തില് വരുത്തിയ നിയമവിരുദ്ധമായ രൂപമാറ്റങ്ങള് ഒഴിവാക്കാന് പലതവണ നിര്ദേശം നല്കിയിട്ടും അത് പാലിക്കാതിരുന്നതാണ് ഫിറ്റ്നസ് സര്ട്ടിഫിക്കറ്റ് നിരസിക്കാന് കാരണമായതെന്ന് റിപ്പോര്ട്ടില് വ്യക്തമാക്കുന്നു.
വാഹന ഉടമയായ ഷൗക്കത്ത് 2021 ജൂണ് ഏഴിനാണ് പുതിയ ഓട്ടോറിക്ഷ വാങ്ങിയത്. പുതിയ വാഹനങ്ങള്ക്ക് ആദ്യത്തെ രണ്ട് വര്ഷം ഫിറ്റ്നസ് പരിശോധന ആവശ്യമില്ലെന്ന നിയമമനുസരിച്ച് 2023 ആഗസ്റ്റ് 17നാണ് ആദ്യ പരിശോധന നടന്നത്. അന്ന് 2025 ആഗസ്റ്റ് 16 വരെ കാലാവധിയുള്ള ഫിറ്റ്നസ് സര്ട്ടിഫിക്കറ്റ് വാഹനത്തിന് അനുവദിച്ചു നല്കുകയും ചെയ്തിരുന്നു.
തുടര്ന്ന് രണ്ടാമത്തെ ഫിറ്റ്നസ് സര്ട്ടിഫിക്കറ്റ് പുതുക്കുന്നതിനായി 2025 നവംബര് 11നാണ് ഷൗക്കത്ത് വാഹനം കൊണ്ടോട്ടി എ.എം.വി.ഐ (അസിസ്റ്റന്റ് മോട്ടോര് വെഹിക്കിള് ഇന്സ്പെക്ടര്) മുമ്പാകെ ഹാജരാക്കിയത്. എന്നാല് പരിശോധന വേളയില് വാഹനത്തില് സുരക്ഷാ മാനദണ്ഡങ്ങള്ക്ക് വിരുദ്ധമായ നിരവധി അനധികൃത രൂപമാറ്റങ്ങള് കണ്ടെത്തിയതിനെ തുടര്ന്ന് ആദ്യഘട്ടത്തില് സര്ട്ടിഫിക്കറ്റ് നിരസിക്കുകയായിരുന്നു.
ഡ്രൈവര് സീറ്റിലെ ആം റെസ്റ്റുകള്, കൂര്ത്ത മെറ്റല് വീല് കപ്പുകള്, ഡ്രൈവര് ക്യാബിന്റെ ഇരുവശങ്ങളിലും വെല്ഡ് ചെയ്ത് പിടിപ്പിച്ച സ്റ്റീല് റെയിലിങ്ങുകള്, യാത്രക്കാരുടെ ക്യാബിന്റെ വലതുവശത്ത് ഉയര്ത്തി വെല്ഡ് ചെയ്ത സ്റ്റീല് റെയിലിങ്ങുകള് എന്നിവയാണ് ഉദ്യോഗസ്ഥര് പ്രധാനമായും കണ്ടെത്തിയത്. യാത്രക്കാരുടെയും ഡ്രൈവറുടെയും സുരക്ഷ മുന്നിര്ത്തി ഇവയെല്ലാം നീക്കം ചെയ്ത ശേഷം വാഹനം വീണ്ടും പരിശോധനക്കായി ഹാജരാക്കാന് പരിശോധകനായ ഉദ്യോഗസ്ഥന് നിര്ദേശിക്കുകയായിരുന്നു.
ഉദ്യോഗസ്ഥന് നിര്ദേശിച്ച മാനദണ്ഡപ്രകാരം വീണ്ടും പരിശോധനക്കായി വാഹനം എ മോട്ടോര് വാഹന ഓഫീസിലേക്ക് എത്തിച്ചപ്പോഴുള്ള ദൃശ്യങ്ങളാണ് ഷൗക്കത്ത് ജീവനൊടുക്കുന്നതിന് മുന്പ് ഫേസ്ബുക്കിലൂടെ പങ്കുവെച്ചത്. ഉദ്യോഗസ്ഥരില് നിന്നും തനിക്ക് നേരിടേണ്ടി വന്ന പ്രയാസങ്ങളെക്കുറിച്ച് പരാമര്ശിച്ചുകൊണ്ടായിരുന്നു ഈ ദൃശ്യങ്ങള് സാമൂഹിക മാധ്യമങ്ങളില് പ്രചരിച്ചത്.
എന്നാല്, പരിശോധന വേളയില് സ്റ്റീല് റെയിലിങ്ങുകള് ഒഴികെ ഉദ്യോഗസ്ഥന് നിര്ദേശിച്ച മറ്റു മാറ്റങ്ങളെല്ലാം ഷൗക്കത്ത് വരുത്തിയിരുന്നുവെന്ന് റിപ്പോര്ട്ടില് ചൂണ്ടിക്കാണിക്കുന്നു. സുരക്ഷാ ഭീഷണി ഉയര്ത്തുന്ന റെയിലിങ്ങുകള് കൂടി കൃത്യമായി നീക്കം ചെയ്യാന് ഉദ്യോഗസ്ഥന് ആവശ്യപ്പെടുന്നതാണ് ഷൗക്കത്ത് തന്നെ പകര്ത്തിയ വീഡിയയോ ദൃശ്യങ്ങളിലുള്ളത്.
വീഡിയോയില് കാണുന്ന പ്രേംകുമാര് എന്ന ഉദ്യോഗസ്ഥന് 2026 മാര്ച്ച് 16ന് കോഴിക്കോട് രാമനാട്ടുകര സബ് ആര്.ടി.ഓ ഓഫീസിലേക്ക് സ്ഥലംമാറിപ്പോയിരുന്നു. ഈ ഉദ്യോഗസ്ഥന്റെ സ്ഥലംമാറ്റത്തിന് ശേഷം ഫിറ്റ്നസ് സര്ട്ടിഫിക്കറ്റിനായി ഷൗക്കത്ത് പിന്നീട് വാഹനം ഓഫീസിലേക്ക് കൊണ്ടുവന്നിട്ടില്ലെന്നും കമീഷണറുടെ റിപ്പോര്ട്ടില് വ്യക്തമാക്കുന്നുണ്ട്.
അതേസമയം, മലപ്പുറത്ത് ഓട്ടോറിക്ഷയ്ക്ക് ഫിറ്റ്നസ് സര്ട്ടിഫിക്കറ്റ് ലഭിക്കാത്തതില് മനംനൊന്ത് ഡ്രൈവര് ഷൗക്കത്ത് ജീവനൊടുക്കിയ സംഭവം അങ്ങേയറ്റം ദൗര്ഭാഗ്യകരവും വേദനാജനകവുമാണെന്ന് ഗതാഗത വകുപ്പ് മന്ത്രി സി.പി. ജോണ് വാര്ത്താക്കുറിപ്പിലൂടെ വ്യക്തമാക്കി. പൊതുജനങ്ങള്ക്ക് സേവനം നല്കുന്ന വകുപ്പുകളില് നിന്ന് ഇത്തരം സംഭവങ്ങള് ഉണ്ടാകാന് പാടില്ലെന്ന് മന്ത്രി ഓര്മ്മിപ്പിച്ചു.
ഈ ദാരുണ സംഭവത്തെക്കുറിച്ച് സമഗ്രവും നിഷ്പക്ഷവുമായ അന്വേഷണം നടത്താന് ഗതാഗത വകുപ്പ് സെക്രട്ടറി ടി.വി. അനുപമയെ സര്ക്കാര് ചുമതലപ്പെടുത്തിയിട്ടുണ്ട്. സംഭവത്തില് രണ്ടു ദിവസത്തിനകം വിശദമായ പ്രാഥമിക റിപ്പോര്ട്ട് സമര്പ്പിക്കാന് മോട്ടോര് വാഹന വകുപ്പ് സെക്രട്ടറിക്ക് കശന നിര്ദേശം നല്കിയിട്ടുണ്ടെന്നും മന്ത്രി മാധ്യമങ്ങളെ അറിയിച്ചു.
മോട്ടോര് വാഹന വകുപ്പ് ഉദ്യോഗസ്ഥരുടെ ഭാഗത്തുനിന്ന് വാഹന പരിശോധനാ വേളയിലോ തുടര് നടപടികളിലോ എന്തെങ്കിലും തരത്തിലുള്ള വീഴ്ചയോ മാനസിക പീഡനമോ ഉണ്ടായിട്ടുണ്ടോ എന്ന് ഗതാഗത സെക്രട്ടറി വിശദമായി അന്വേഷിക്കും. ഷൗക്കത്ത് ജീവനൊടുക്കുന്നതിന് മുന്പ് സമൂഹമാധ്യമങ്ങളില് പങ്കുവെച്ച ദൃശ്യങ്ങളും കുറിപ്പും അന്വേഷണ വിധേയമാക്കുമെന്നും മന്ത്രി കൂട്ടിച്ചേര്ത്തു.
