ഡൽഹി: ദേശീയപാതകളിലെ ടോള്‍ പിരിവ് കൂടുതല്‍ വേഗത്തിലും എളുപ്പത്തിലും ആക്കാൻ പുതിയ സംവിധാനവുമായി ദേശീയപാത അതോറിറ്റി ഓഫ് ഇന്ത്യ.
തമിഴ്നാട്ടില്‍ ആദ്യമായി മള്‍ട്ടി-ലെയ്ൻ ഫ്രീ ഫ്ലോ ടോളിങ് സംവിധാനം നടപ്പിലാക്കി. എൻഎച്ച്‌-179ബി യിലെ താംബരം-തിണ്ടിവനം പാതയിലെ പരനൂർ ടോള്‍ പ്ലാസയിലാണ് പുതിയ സംവിധാനം ആരംഭിച്ചിരിക്കുന്നത്.
ഇതോടെ ടോള്‍ നല്‍കുന്നതിനായി വാഹനങ്ങള്‍ ടോള്‍ പ്ലാസയില്‍ നിർത്തേണ്ട സാഹചര്യം ഒഴിവാകും.
ടോള്‍ പ്ലാസയില്‍ വാഹനം നിർത്തേണ്ട
പുതിയ മള്‍ട്ടി-ലെയ്ൻ ഫ്രീ ഫ്ലോ സംവിധാനത്തിന്റെ പ്രധാന പ്രത്യേകത വാഹനങ്ങള്‍ക്ക് ടോള്‍ പ്ലാസയില്‍ നിർത്താതെ തന്നെ കടന്നുപോകാൻ കഴിയുമെന്നതാണ്. വാഹനം സ്വന്തം ലെയ്നില്‍ തുടരുന്നതിനിടെ ടോള്‍ പിരിവ് സ്വമേധയാ പൂർത്തിയാകും. ഇതിനായി ഓട്ടോമാറ്റിക് നമ്പർ പ്ലേറ്റ് റെക്കഗ്നിഷൻ ക്യാമറകളും ഫാസ്ടാഗ് സംവിധാനവുമാണ് ഉപയോഗിക്കുന്നത്.
ക്യാമറകള്‍ വാഹനത്തിന്റെ രജിസ്ട്രേഷൻ നമ്പർ തിരിച്ചറിയും. ഫാസ്ടാഗ് വഴി ടോള്‍ തുക വാഹന ഉടമയുടെ അക്കൗണ്ടില്‍ നിന്ന് സ്വമേധയാ ഈടാക്കുകയും ചെയ്യും.
ഗതാഗതക്കുരുക്കും യാത്രാസമയവും കുറയും
ടോള്‍ പ്ലാസകളില്‍ വാഹനങ്ങള്‍ നിർത്തേണ്ടിവരാത്തതിനാല്‍ ഗതാഗതക്കുരുക്ക് കുറയ്ക്കാൻ പുതിയ സംവിധാനത്തിന് സാധിക്കുമെന്ന് ദേശീയപാത അതോറിറ്റി ഓഫ് ഇന്ത്യ വ്യക്തമാക്കി. വാഹനങ്ങള്‍ നിരയില്‍ കാത്തുനില്‍ക്കേണ്ട സാഹചര്യം ഒഴിവാകുന്നതോടെ യാത്രാസമയവും കുറയും. ഇടയ്ക്കിടെ വാഹനം നിർത്തുകയും വീണ്ടും ഓടിക്കുകയും ചെയ്യേണ്ട സാഹചര്യം കുറയുന്നതിനാല്‍ ഇന്ധന ഉപഭോഗത്തിലും കുറവുണ്ടാകാം. ടോള്‍ പ്ലാസകളിലെ വാഹനങ്ങളുടെ കാത്തിരിപ്പ് കുറയുന്നത് അന്തരീക്ഷ മലിനീകരണം കുറയ്ക്കാനും സഹായിക്കുമെന്നാണ് വിലയിരുത്തല്‍.
ടോള്‍ പിരിവ് കൂടുതല്‍ സുതാര്യമാകും
ടോള്‍ പിരിവിലെ മനുഷ്യ ഇടപെടല്‍ കുറയ്ക്കാനും പുതിയ സംവിധാനത്തിലൂടെ സാധിക്കും. ഇതുവഴി ടോള്‍ പിരിവ് വേഗത്തിലാക്കുന്നതിനൊപ്പം നടപടിക്രമങ്ങള്‍ കൂടുതല്‍ സുതാര്യവും കാര്യക്ഷമവുമാക്കാൻ കഴിയുമെന്ന് ദേശീയപാത അതോറിറ്റി ഓഫ് ഇന്ത്യ അറിയിച്ചു.
