ഇടുക്കി: കരുവന്നൂര് മാതൃകയില് തോപ്രാംകുടിയിലും സിപിഐഎം ഭരിക്കുന്ന ബാങ്കില് വന് സാമ്പത്തീക തട്ടിപ്പെന്ന് റിപ്പോര്ട്ട്.
10 കോടി രൂപ ഭാരവാഹികള് ചേര്ന്ന് തട്ടിയെടുത്തതായിട്ടാണ് ആരോപണം. 10 കോടി 42 ലക്ഷം രൂപയുടെ ക്രമക്കേടാണ് കണ്ടെത്തിയത്.
തട്ടിപ്പ് പുറത്തായതോടെ ഭരണസമിതിയും ജീവനക്കാരും പ്രതിക്കൂട്ടിലായിരിക്കുകയാണ്. ക്രമക്കേടില് ഉള്പ്പെട്ട മൂന്ന് ജീവനക്കാര് ഉള്പ്പെടെയുള്ളവരെ സസ്പെന്റ് ചെയ്തിട്ടുണ്ട്. പണം കിട്ടാതെ വന്ന ചില നിക്ഷേപകര് നല്കിയ പരാതിയിലാണ് ഇപ്പോള് അന്വേഷണം വന്നിരിക്കുന്നത്. സഹകരണവകുപ്പ് അന്വേഷണവുമായി നീങ്ങുകയാണ്. 10,42,34,000 രൂപയുടെ തട്ടിപ്പാണ് പ്രാഥമികമായി വിലയിരുത്തിയിരിക്കുന്നത്.
സംഭവത്തില് മുരിക്കാശ്ശേരി പോലീസ് കേസെടുത്തിരിക്കുകയാണ്. 2020 മുതല് തുടങ്ങിയ തട്ടിപ്പാണെന്നാണ് വിലയിരുത്തല്. ഇടതുഭരണസമിതിയാണ് ബാങ്ക് ഇപ്പോള് ഭരിക്കുന്നത്. 11 പേരിലെ ഒമ്പതും സിപിഐഎമ്മുകാരാണ്. വ്യാജവിലാസം ഉള്പ്പെടെയുള്ള വ്യാജരേഖകളില് വായ്പ നല്കിയാണ് തട്ടിപ്പ്. വിവാദമായതോടെ വായ്പയ്ക്കായി സമര്പ്പിക്കപ്പെട്ട 236 അപേക്ഷകള് പെട്ടെന്ന് കാണാതായതായും വിവരമുണ്ട്.
നിലവിലെ ബാങ്ക് സെക്രട്ടറിയും മുന് പ്രസിഡന്റുമെല്ലാം തട്ടിപ്പ് നടത്തിയവരുടെ പട്ടികയിലുണ്ട്. ബാങ്ക് 20 കോടി കേരളാബാങ്കിലും 10 കോടി നിക്ഷേപകര്ക്കും നല്കാനുണ്ട്. എന്നാല് 13 കോടിയേ പിരിച്ചെടുക്കാനുള്ളു എന്നാണ് ബാങ്കിന്റെ രേഖകളില് പറയുന്നത്. കരുവന്നൂര് ബാങ്ക് തട്ടിപ്പിന് സമാനമായ തട്ടിപ്പാണ് ഇതെന്നാണ് സൂചനകള്. തട്ടിപ്പിന്റെ കൂടുതല് വിവരങ്ങള് പുറത്ത് വരേണ്ടതുണ്ട്. സഹകരണ വകുപ്പ് അന്വേഷണത്തിലേക്ക നീങ്ങുകയാണ്.
