തിരുവനന്തപുരം : തിരുവനന്തപുരം മൃഗശാല മാറ്റത്തിനെതിരെ പ്രതിഷേധം ശക്തമാക്കുന്നു. മൃഗശാല മാറ്റുന്നതിനെ പ്രമുഖ വന്യജീവി സംരക്ഷകനും പത്മശ്രീ ജേതാവുമായ റോമുലസ് വിറ്റക്കർ വിമർശിച്ചു. സാമ്പത്തിക-പാരിസ്ഥിതി വിഷയങ്ങള് ഉന്നയിച്ച് പ്രതിപക്ഷം സമരം നടത്തുന്നതിനിടെയാണ് വിദഗ്ധരും എതിർപ്പ് പ്രകടിപ്പിക്കുന്നത്. മൃഗശാല നെയ്യാറിലേക്ക് മാറ്റുന്നത് നല്ല ആശയമല്ലെന്നും പകരം കൂടുതല് പണം ചെലവഴിച്ച് നിലവിലെ മൃഗശാലയെ രാജ്യാന്തര നിലവാരത്തിലേക്ക് മാറ്റുകയാണ് വേണ്ടതെന്നുമായിരുന്നു വിറ്റക്കറിന്റെ പ്രസ്താവന.
മൃഗശാല മാറ്റവുമായി സർക്കാർ മുനോട്ട് പോവുകയാണെന്ന സൂചനകള്ക്കിടെയാണ് വിമർശനവും ശക്തമാകുന്നത്. മുഖ്യമന്ത്രിയുടെ ആശയത്തിന് ഒരു ഭാഗത്ത് പിന്തുണ ലഭിക്കുമ്പോൾ മറുഭാഗത്ത് വിമർശനവും ഉയരുന്നുണ്ട്. നീക്കത്തിന് തിരുവനന്തപുരം മേയറുടെ ഉള്പ്പെടെ പിന്തുണ മുഖ്യമന്ത്രിക്ക് ലഭിച്ചിരുന്നു.
എന്നാല്, മൃഗശാല മാറ്റത്തിന് പിന്നില് വാണിജ്യ താല്പ്പര്യം മാത്രമാണെന്നാണ് പ്രതിപക്ഷത്തിന്റെ ആരോപണം. നീക്കം അനുവദിക്കില്ലെന്ന നിലപാടെടുത്ത സിപിഎം പ്രതിഷേധവും സംഘടിപ്പിക്കുന്നുണ്ട്. അന്താരാഷ്ട്ര തലത്തില് അടക്കം അറിയപ്പെടുന്ന വന്യജീവി സംരക്ഷകനാണ് റോമുലസ് വിറ്റക്കർ. മദ്രാസ് സ്നേക്ക് പാർക്ക് സ്ഥാപിക്കുന്നതില് മുഖ്യ പങ്കുവഹിച്ചതും വിറ്റക്കറായിരുന്നു. ആവാസവ്യവസ്ഥയോട് ചേർന്ന് മൃഗശാലയൊരുക്കുന്നതാണ് മൃഗങ്ങള്ക്കും നല്ലതെന്നും മൃഗശാലയിരുന്ന സ്ഥലം മാഡിസണ് സ്ക്വയർ പോലെ ഉദ്യാനപാർക്ക് ആക്കുമെന്നുമായിരുന്നു മുഖ്യമന്ത്രിയുടെ പ്രഖ്യാപനം.
