തിരുവനന്തപുരം: സൈനിക ഉദ്യോഗസ്ഥനെന്ന് തെറ്റിദ്ധരിപ്പിച്ച്‌ വിവാഹവാഗ്ദാനം നല്‍കി യുവതിയില്‍ നിന്ന് ലക്ഷങ്ങള്‍ തട്ടിയെടുത്ത യുവാവ് വിഴിഞ്ഞം പോലീസിന്റെ പിടിയിലായി.
നെയ്യാറ്റിൻകര ഊരൂട്ടുകാല രോഹിണി നിവാസില്‍ ശ്രീജിത്തിനെയാണ് (32) വിഴിഞ്ഞം പോലീസ് അറസ്റ്റ് ചെയ്തത്. വിഴിഞ്ഞം സ്വദേശിനിയായ യുവതി നല്‍കിയ പരാതിയുടെ അടിസ്ഥാനത്തിലാണ് പോലീസ് നടപടി.
സമൂഹ മാധ്യമങ്ങളില്‍ സൈനിക ഉദ്യോഗസ്ഥന്റെ യൂണിഫോമിലുള്ള ചിത്രങ്ങള്‍ പോസ്റ്റ് ചെയ്താണ് ഇയാള്‍ യുവതിയുമായി സൗഹൃദം സ്ഥാപിച്ചത്. തുടർന്ന് വാട്ട്‌സ്‌ആപ്പ് വഴി നിരന്തരം സംസാരിച്ച്‌ വിശ്വാസ്യത നേടിയെടുക്കുകയും വിവാഹവാഗ്ദാനം നല്‍കുകയുമായിരുന്നു. അതിനുശേഷം വിവിധ ആവശ്യങ്ങള്‍ ഉന്നയിച്ച്‌ പലപ്പോഴായി 3,93,000 രൂപയും യുവതിയുടെ ചിത്രങ്ങളും ഇയാള്‍ കൈക്കലാക്കി.
സംഭവത്തില്‍ സംശയം തോന്നിയ യുവതി പോലീസില്‍ പരാതി നല്‍കുകയായിരുന്നു. തുടർന്ന് വിഴിഞ്ഞം പോലീസ് രൂപീകരിച്ച പ്രത്യേക അന്വേഷണ സംഘമാണ് പ്രതിയെ പിടികൂടിയത്. സമാന രീതിയിലുള്ള തട്ടിപ്പില്‍ പെട്ട് അടുത്തിടെ പത്തനംതിട്ടയില്‍ യുവതി ആത്മഹത്യ ചെയ്ത കേസില്‍ ഇയാള്‍ ജയിലില്‍ കഴിഞ്ഞിരുന്നതായി ചോദ്യം ചെയ്യലില്‍ പോലീസ് കണ്ടെത്തി.
ഇതിനുപുറമേ ഏഴോളം യുവതികളെ സമാനമായ രീതിയില്‍ വഞ്ചിച്ചതായി ഇയാള്‍ പോലീസിനോട് സമ്മതിച്ചിട്ടുണ്ട്. കോടതിയില്‍ ഹാജരാക്കിയ പ്രതിയെ റിമാൻഡ് ചെയ്തു.
