ഡൽഹി: ഡൽഹി പോലീസ് വനിതാ മാധ്യമ പ്രവർത്തകരെ കയ്യേറ്റം ചെയ്തു എന്നതടക്കമുള്ള ഹർജികള്‍ പരിഗണിക്കുന്നത് സുപ്രീം കോടതി വ്യാഴാഴ്ചത്തേക്ക് മാറ്റി.
കോണ്‍ഗ്രസ് പ്രവർത്തകർ സുപ്രീം കോടതിക്കകത്ത് മുദ്രാവാക്യം വിളിച്ചതിനെതിരായ ബി ജെ പി ഹർജിയും അന്ന് പരിഗണിക്കും. ഡൽഹി പോലീസിലെ മുതിർന്ന ഉദ്യോഗസ്ഥൻ വ്യാഴാഴ്ച ഹാജരാകണമെന്നും കോടതി നിർദ്ദേശിച്ചു.
മുഖ്യ തെരഞ്ഞെടുപ്പ് കമ്മീഷണർക്ക് എതിരായി ഇന്ത്യാസഖ്യം ഇന്നലെ നല്‍കിയ ഹർജിയിലെ പിഴവുകള്‍ തിരുത്തി നല്‍കാനും സുപ്രീം കോടതി നിർദ്ദേശിച്ചു. ഇത് ഉടൻ തന്നെ തിരുത്തി നല്‍കുമെന്ന് കോണ്‍ഗ്രസ് നേതാക്കള്‍ വ്യക്തമാക്കി.
പ്രതിഷേധങ്ങള്‍ നേരിടാനുള്ള പോലീസ് നടപടിക്കിടെ വനിതാ മാധ്യമ പ്രവർത്തകരെ കയ്യേറ്റം ചെയ്തു എന്ന് ചൂണ്ടിക്കാട്ടി മൂന്ന് ഹർജികളാണ് ഇന്ന് സുപ്രീം കോടതിയില്‍ പരാമർശിച്ചത്. ജന്തർ മന്തർ സമരവേദി അല്ലാതാക്കിയ പോലീസ് ഉത്തരവിനെതിരായ ഹർജിയും സുപ്രീം കോടതിയില്‍ എത്തി.
എന്നാല്‍ ചീഫ് ജസ്റ്റിസ് സൂര്യകാന്ത് അധ്യക്ഷനായ മൂന്നംഗ ബെഞ്ചിലെ ജസ്റ്റിസ് വി മോഹനക്ക് സുഖമില്ലാത്തതിനാല്‍ ഇന്ന് ഹർജികള്‍ വിശദമായി കേട്ടില്ല. എല്ലാ ഹർജികളും ഒന്നിച്ച്‌ വ്യാഴാഴ്ച പരിഗണിക്കാമെന്ന് ചീഫ് ജസ്റ്റിസ് വ്യക്തമാക്കി.
സുപ്രീം കോടതി രജിസ്ട്രിയില്‍ രാഹുല്‍ ഗാന്ധി അടക്കമുള്ള നേതാക്കള്‍ എത്തിയപ്പോള്‍ പ്രവർത്തകർ ബഹളം വെക്കുകയും മുദ്രാവാക്യം വിളിക്കുകയും ചെയ്തതിന് എതിരായ ഹർജി ബി ജെ പി നേതാവ് ഗൗരവ് ഭാട്ടിയ ആണ് നല്‍കിയത്. ഇക്കാര്യവും വ്യാഴാഴ്ച കേള്‍ക്കാമെന്ന് കോടതി അറിയിച്ചു.
ഹർജികള്‍ പരിഗണിക്കുമ്പോള്‍ ഒരു മുതിർന്ന പോലീസ് ഉദ്യോഗസ്ഥൻ കൂടി ഉണ്ടെങ്കില്‍ കാര്യങ്ങള്‍ ചോദിച്ചറിയാൻ എളുപ്പമാകുമെന്നും ചീഫ് ജസ്റ്റിസ് വ്യക്തമാക്കി.
