കോട്ടയം: അനധികൃത തട്ടുകടകൾക്ക് തെരുവകച്ചവടത്തിനും നിയന്ത്രണം ഏർപ്പെടുത്താൻ ഒരുങ്ങി നഗരസഭ.
തെരുവോരക്കച്ചവടത്തിന്റെ പേരിൽ പൊതുവഴികൾ കൈയേറിയും വഴിയാത്രക്കാർക്ക് തടസമുണ്ടാക്കിയും
ഹോട്ടൽ മാതൃകയിൽ പ്രവർത്തിക്കുന്ന കടകൾ അനുവദിക്കേണ്ടെന്നാണ് തീരുമാനം.
തെരുവോരക്കച്ചവടം ഉപജീവനമാർഗമായി നടത്തുന്നവരെ സംരക്ഷിക്കുമ്പോൾത്തന്നെ അതിന്റെ മറവിൽ
വൻതുക നിക്ഷേപിച്ച് വാണിജ്യാടിസ്ഥാനത്തിൽ പ്രവർത്തിക്കുന്നവരെ നിയന്ത്രിക്കും.
സുപ്രീംകോടതി വിധിയുടെ പശ്ചാത്തലത്തിൽ തെരുവോരക്കച്ചവടക്കാർക്ക് ഉപജീവനത്തിനുള്ള അവസരം നൽകാനാണ് തീരുമാനം.
ഉടൻ ചേരുന്ന കൗൺസിൽ യോഗം ഇത് സംബന്ധിച്ച് തീരുമാനമെടുക്കും. ചെറിയ കുടുംബത്തിന് ഉപജീവനമാർഗമെന്ന നിലയിൽ നടത്തേണ്ട തട്ടുകടകൾ ചെറിയ ഹോട്ടലുകൾക്ക് സമാനമായ രീതിയിൽ കച്ചവടം നടത്തുകയാണ്.
പൊതുവഴികൾ കൈയേറി ഡെസ്കുകൾ നിരത്തി ഭക്ഷണശാലകൾക്ക് സമാനമായ സൗകര്യങ്ങൾ ഒരുക്കിയാണ് കച്ചവടം
റോഡരിക് കൈയേറിയും മറ്റുള്ളവർക്ക് മറിച്ചുനൽകിയും തെരുവോരക്കച്ചവടത്തിന്റെ മറവിൽ കൊള്ളനടത്തുകയാണ് ഒരു വിഭാഗം.
യഥാർത്ഥ തെരുവുകച്ചവടക്കാരുടെ ഉപജീവനത്തിനായി അനുവദിച്ചിട്ടുള്ള സൗകര്യങ്ങൾ മറ്റൊരു വിഭാഗം വാണിജ്യലാഭത്തിനായി ഉപയോഗിക്കുകയാണ്.
സാധാരണ തട്ടുകടകളുടെയും ബജിക്കടകളുടെയും പരിധി കടന്ന് വിവിധതരം ഭക്ഷണവിഭവങ്ങളും ബാർബിക്യൂ ഉൾപ്പെടെയുള്ള വിഭവങ്ങളും വിൽക്കുന്നു. ഹോട്ടലുകൾക്ക് സമാനമായ വിലയാണ് ഇവിടെയും.
വാടകയും വൈദ്യുത ചാർജും ലൈസൻസ് ഫീസും നൽകി പ്രവർത്തിക്കുന്ന ഹോട്ടലുകൾ നഷ്ടത്തിലോടുമ്പോഴാണ് തട്ടുകടകളുടെ മറവിൽ ചില വൻ ലാഭം കൊയ്യുന്നത്.
അതേസമയം തെരുവുകച്ചവടക്കാരുടെ അപേക്ഷകൾ തുടർനടപടിക്കായി നഗരസഭ പരിശോധിക്കുകയാണ്.






