തിരുവനന്തപുരം: ശ്രീകാര്യം പാങ്ങപ്പാറയില്‍ 17 കാരൻ അഭിരാമിന്റെ കൊലപാതകത്തില്‍ പ്രതികള്‍ ലക്ഷ്യമിട്ടത് ഇരട്ടക്കൊലപാതകമെന്ന് പൊലീസ്.
കൊലയ്ക്ക് പിന്നില്‍ കൂടുതല്‍ പേർക്ക് പങ്കുണ്ടോ എന്ന് അന്വേഷണം നടത്തും. അഭിറാമിന്റെ ഇൻസ്റ്റഗ്രാം ചാറ്റുകള്‍ ഡിലീറ്റായതെങ്ങനെയെന്ന് പരിശോധിക്കും. കാണാതായ മൊബൈല്‍ ഫോണ്‍ കണ്ടെത്താൻ തിരച്ചില്‍ പുരോഗമിക്കുകയാണ്. അഭിരാമിന്റെ ഇൻസ്റ്റഗ്രാം അക്കൗണ്ട് മറ്റൊരു പെണ്‍ സുഹൃത്തുമായി ഷെയർ ചെയ്യപ്പെട്ടിരുന്നതായാണ് സൈബർസെല്‍ കണ്ടെത്തല്‍.
കേസില്‍ പൊലീസിന് വീഴ്ച സംഭവിച്ചിട്ടില്ലെന്ന് ക്രമസമാധാന ചുമതലയുള്ള ADGPക്ക് സിറ്റി പൊലീസ് കമ്മീഷണർ റിപ്പോർട്ട് സമർപ്പിച്ചു. ബന്ധുക്കള്‍ 17 കാരനെ കാണ്മാനില്ല എന്ന് പൊലീസ് സ്റ്റേഷനില്‍ പരാതി നല്‍കുന്നത് രാത്രി 10 മണിക്കാണ്. അതിന് മുൻപേ കൊലപാതകം നടന്നു കഴിഞ്ഞു. പരാതി ലഭിച്ചയുടൻ അന്വേഷണം നടത്തി പൊലീസ് പ്രതികളിലേക്ക് എത്തിയിരുന്നു. അന്ന് രാത്രി തന്നെ ഒന്നാം പ്രതിയെ കസ്റ്റഡിയില്‍ എടുക്കുകയും ചെയ്തു. എന്നാല്‍ ഒന്നാം പ്രതി പ്രായപൂർത്തിയാകാത്തതിനാല്‍ സ്റ്റേഷനില്‍ നിർത്താൻ കഴിയാത്തതിനാല്‍ മാതാപിതാക്കളോടൊപ്പം വിട്ടുവെന്നും റിപ്പോർട്ടില്‍ വ്യക്തമാക്കുന്നുണ്ട്.
