കോട്ടയം:കോട്ടയത്ത്‌ ആറ് മാസത്തിനിനിടെ തുടങ്ങിയത് 30 സ്പാകൾ.
പുതിയ ബിസിനസ് സംരഭമെന്ന നിലയിൽ ഒരുവശത്ത് നിയമപരമായി
പ്രവർത്തിക്കുമ്പോഴാണ് മറുവശത്ത് അനാശ്യാസ കേന്ദ്രങ്ങളാകുന്നത്.
ലൈസൻസ്, പൊലീസ് ക്ളിയറൻസ് സർട്ടിഫിക്കറ്റ്, ജീവനക്കാരുടെ യോഗ്യത തെളിയിക്കുന്ന രേഖകൾ തുടങ്ങിയവ ഇല്ലാതെ സ്പാ തുടങ്ങാനാവില്ലെന്നാണ് നിയമം.
ടൂറിസം കേന്ദ്രങ്ങളിലെ പരിശോധന അപ്രായോഗികമാകുന്നതും ഇവർക്ക് തുണയാകുകയാണ്.
തദ്ദേശസ്ഥാപനങ്ങളുടെ ലൈസൻസ് നേടി അനധികൃത ഇടപാടുകൾ നടക്കുന്നയിടങ്ങളുമുണ്ട്.
നഗരത്തിന് പുറമെ ജില്ലയുടെ ടൂറിസം കേന്ദ്രങ്ങളിലേയും പ്രധാന ആകർഷണമായി സ്പാ മസാജ് വെൽനെസ് കേന്ദ്രങ്ങൾ മാറി.
ക്രോസ് മസാജിംഗ് ഉൾപ്പെടെയുള്ള സേവനങ്ങൾ കാട്ടിയുള്ള പരസ്യങ്ങളും നഗരത്തിന്റെ വിവിധ ഭാഗങ്ങളിൽ കാണാം.
സോഷ്യൽമീഡിയ വഴി ആളുകളെ ആകർഷിക്കും.
ബ്യൂട്ടിപാർലർ ലൈസൻസുകൾ ദുരുപയോഗം ചെയ്യുന്നവരുമുണ്ട്.
പലതിന്റെയും നടത്തിപ്പുകാർക്ക് ഉന്നതബന്ധങ്ങളുണ്ട്.
സ്പാ സെന്ററിന്റെ പ്രധാന ആകർഷണം മസാജിംഗിന് പുറമേയുള്ള സേവനങ്ങളാണ്. അനാശാസ്യകേന്ദ്രങ്ങളായ ഇവിടെ മസാജ് ചെയ്യുന്ന പെൺകുട്ടികൾക്ക് ടിപ്പ് നൽകണം.
ഉയർന്ന ടിപ്പെങ്കിൽ കൂടുതൽ സേവനങ്ങൾ. ആഡംബരമനുസരിച്ച് നിരക്കും കൂടും.
നിയമാനുസൃതമായി സ്പാ സെന്റർ നടത്താൻ ലൈസൻസിനായി തദ്ദേശഭരണകൂടത്തെ സമീപിക്കുകയാണ് ആദ്യ വഴി. സ്പാ മസാജ് സെന്ററിന് വെൽനെസ് സെന്റർ എന്ന നിലയിൽ തദ്ദേശ സ്ഥാപനത്തിൽ നിന്ന് ലൈസൻസ് ലഭിക്കും. എന്നാൽ നടത്തണമെങ്കിൽ വേറെയും നിബന്ധനകളുണ്ട്.
അതിൽ പ്രധാനം തെറപ്പിസ്റ്റ് നിശ്ചിത യോഗ്യതയുള്ള ആളായിരിക്കണം എന്നതാണ്. പകർച്ചവ്യാധി ഇല്ലെന്നതുൾപ്പെടെയുള്ള ആരോഗ്യ സർട്ടിഫിക്കറ്റും വേണം.
ഇവയെല്ലാം നേടി മറ്റ് ഇടപാടുകൾ നടത്തിയാൽ കണ്ടെത്തുക പ്രയാസം.
