കൊച്ചി: മഹാരാജാസ് കോളേജില്‍ ബിരുദ വിതരണ ചടങ്ങിനെത്തിയ ഉന്നത വിദ്യാഭ്യാസ മന്ത്രി റോജി എം ജോണിന്‍റെ പ്രസംഗം തടഞ്ഞ് ചടങ്ങ് അലങ്കോലമാക്കിയെന്ന വിവാദത്തില്‍ നടപടി.
സംഭവത്തില്‍ രണ്ട് എസ് എഫ് ഐ പ്രവർത്തകരെ 10 ദിവസത്തേക്ക് സസ്പെൻഡ് ചെയ്തു. കോളേജ് യൂണിയൻ ചെയർമാൻ പ്രണീല്‍ ചാജ്, വൈസ് ചെയർപേഴ്സണ്‍ നഫീസത്തുള്‍ മിസ്രിയ എന്നിവർക്കെതിരെയാണ് കോളേജ് കൗണ്‍സിലിന്‍റെ നടപടി.
നടപടിയ്ക്ക് എതിരെ സംസ്ഥാന വ്യാപകമായ പ്രതിഷേധം ഉണ്ടാകുമെന്ന് എസ് എഫ് ഐ വ്യക്തമാക്കി. നടപടി എത്രയും വേഗം പിൻവലിച്ചില്ലെങ്കില്‍ അതിശക്തമായ പ്രക്ഷോഭം നേരിടേണ്ടി വരുമെന്നാണ് എസ് എഫ് ഐ സംസ്ഥാന സെക്രട്ടറി പി എസ് സഞ്ജീവ് അടക്കമുള്ളവരുടെ മുന്നറിയിപ്പ്.
കാലടി സംസ്കൃത സർവകലാശാലയിലെ സസ്പെൻഷനില്‍ പ്രതിഷേധിച്ചാണ് മഹാരാജാസിലെ എസ് എഫ് ഐ നേതാക്കള്‍ മന്ത്രിയെ ചോദ്യം ചെയ്തതിന്‍റെ പേരില്‍ ഇപ്പോള്‍ സസ്പെൻഷനില്‍ ആയത്. സ്റ്റേജില്‍ കയറി മന്ത്രിയോട് കയർത്തതും ബിരുദ വിതരണ ചടങ്ങ് അലങ്കോലപ്പെടുത്തിയതും വലിയ അച്ചടക്ക ലംഘനമായാണ് ഇന്ന് ചേർന്ന കൗണ്‍സില്‍ യോഗം വിലയിരുത്തിയത്.
മന്ത്രിയോട് വേദിയില്‍ കയറി ചോദ്യം ചോദിച്ച യൂണിയൻ വൈസ് ചെയർപേഴ്സണ്‍ നഫീസത്തുല്‍ മിസ്രിയ പ്രതിഷേധത്തിന് നേതൃത്വം നല്‍കിയ ചെയർമാൻ പ്രണീല്‍ രാജ് എന്നിവരെ 10 ദിവസത്തേക്കാണ് സസ്പെൻഡ് ചെയ്തത്. സംഭവത്തില്‍ വിശദമായ അന്വേഷണം നടത്താനും കൗണ്‍സില്‍ തീരുമാനിച്ചു.
സസ്പെൻഷൻ പ്രഖ്യാപനത്തിന് പിന്നാലെ എസ് എഫ് ഐയുടെ നേതൃത്വത്തില്‍ കോളേജില്‍ പ്രതിഷേധ പ്രകടനം നടന്നു. സസ്പെൻഷൻ നടപടിയില്‍ സംസ്ഥാന വ്യാപകമായി പ്രതിഷേധം നടത്തുമെന്ന് എസ് എഫ് ഐ നേതൃത്വം അറിയിച്ചു.
